गणेशोत्सव मंडळांना आपत्कालीन व्यवस्थापनाचे धडे

गणेशोत्सव मंडळांना आपत्कालीन व्यवस्थापनाचे धडे
निर्विघ्‍नपणे सण साजरा करण्याचा प्रयत्‍न
सकाळ वृत्तसेवा
मुंबई, ता. १२ ः सार्वजनिक श्री गणेशोत्सव मंडळांनी श्रीगणेशोत्सव साजरा करताना कोणती काळजी घ्यावी, आपत्ती उद्भवू नये, यासाठी कशी खबरदारी घ्यावी, आपत्ती उद्भवलीच तर आपत्कालीन व्यवस्थापन कसे करावे, याबाबत महापालिकेच्या आपत्ती व्यवस्थापन विभागाकडून श्री गणेशोत्सव मंडळातील स्वयंसेवकांना एकदिवसीय प्रशिक्षण देण्यात येणार आहे. या उपक्रमासाठी पालिकेच्या प्रत्येक विभाग कार्यालयाकडून सार्वजनिक श्री गणेशोत्सव मंडळांशी समन्वय साधण्यात येणार आहे.
 गणेशोत्सवासाठी लाखो भाविक, पर्यटक मुंबईत येतात. त्यामुळे मंडळांच्या उत्सव मंडपांमध्ये, परिसरात मोठ्या प्रमाणात गर्दी उसळते. अशा वेळी गर्दीचे नियोजन कसे करावे, कोणतीही दुर्घटना होऊ नये, यासाठी कोणती काळजी घ्यावी, प्रसाद वाटप करताना कोणती दक्षता घ्यावी, आपत्कालीन कार्यवाही कोणती व कशी असावी, याबाबतचे प्रशिक्षण देण्यात येणार आहे. प्रत्येक श्री गणेश मंडळातील दोन स्वयंसेवकांना हे एकदिवसीय प्रशिक्षण दिले जाणार आहे.  आपत्कालीन व्यवस्थापनात नागरी सहभाग वाढविण्याच्या दृष्टीने हे प्रशिक्षण महत्त्वाचे ठरणार असल्याचे पालिकेने म्हटले आहे.
विभाग कार्यालयाकडून प्राप्त झालेली सार्वजनिक मंडळांची यादी उपआयुक्त (परिमंडळ दोन) आणि गणेशोत्सव समन्वयक यांच्यामार्फत आपत्कालीन व्यवस्थापन विभागास उपलब्ध करून देण्यात आली आहे. सार्वजनिक श्री गणेशोत्सव मंडळांना द्यावयाच्या एकदिवसीय प्रशिक्षणाचा कार्यक्रम तयार करण्यात आला आहे. या प्रशिक्षण कार्यक्रमाचे नियोजन करण्यासाठी आपत्ती व्यवस्थापन विभागाकडून सहाय्यक प्रमुख अधिकारी राजेंद्र लोखंडे व आपत्ती व्यवस्थापन अधिकारी विकास कांबळे यांची समन्वयक म्हणून नियुक्तीदेखील करण्यात आली आहे. 

कोणते प्रशिक्षण मिळणार?
स्वयंसेवकांना आपत्ती म्हणजे काय, धोक्याची ओळख, जोखमीचे व्यवस्थापन, आपत्तीत काय करावे, काय करू नये, अग्निशमनची प्रात्यक्षिके, प्रथमोपचार कसा करावा, गर्दीवर नियंत्रण कसे राखावे, आदींबाबत प्रशिक्षण देण्यात येणार आहे. या प्रशिक्षणात पालिका अधिकारी, मुंबई अग्निशमन दलाचे अधिकारी, पोलिस अधिकारी, महानगरपालिका रुग्णालयातील वैद्यकीय अधिकारी, बृहन्मुंबई विद्युत पुरवठा आणि परिवहन विभागाचे अधिकारी मार्गदर्शन करणार आहेत.  या उपक्रमात सहभागी व्हावे, असे आवाहन उपआयुक्त आणि श्री गणेशोत्सव समन्वयक प्रशांत सपकाळे यांनी केले आहे.