खालापुरातील चोरीप्रकरणी सहा जणांना अटक

खालापूर, ता. १२ (बातमीदार) ः वीकेण्ड तसेच सुट्टीच्या दिवशी खालापूर परिसरात पर्यटकांची नेहमीच गर्दी होते. तालुक्‍यातून द्रुतगती मार्ग जात असल्‍याने अपघात, गुन्ह्यांचे प्रमाणही दिवसेंदिवस वाढत आहे; मात्र शहरात ठिकठिकाणी बसवण्यात आलेल्‍या सीसीटीव्हींमुळे गुन्हेगारांचा शोध घेण्यास पोलिसांना मोठी मदत होत आहे.
खोपोली पोलिस ठाण्याच्या हद्दीतील ताकई फाटा येथे दुकानामध्ये चोरी करणाऱ्या परराज्यातील जुबेर एहसान शेख, आलम युसुफ मणियार, दीपक कपिलदेव तिवारी, रामविलास चिकनू यादव, जुबेर बहाब मेमन, सिराउजदीन इबारतुल्ला खान या सहा आरोपींना सीसीटीव्हीच्या मदतीने पोलिसांनी शिताफीने अटक केली. त्‍यांच्याकडून चोरीचा सर्व मुद्देमाल हस्तगत केला आहे. या आरोपी सध्या पुणे तसेच खालापूर परिसरात राहण्यात असून मूळचे उत्तर प्रदेशातील असल्याचे तपासात उघड झाले आहे.
ताकई फाटा गावातील रामचंद्र भिकू रासकर यांचे दुकान ३ जुलैला फोडून पॉलीकॅब कंपनीच्या एकूण तीन लाख २० हजार ५०० रुपये किमतीच्या केबल चोरल्‍या होत्‍या. याप्रकरणी गुन्हा दाखल झाल्यानंतर रायगड पोलिस अधीक्षक आंचल दलाल यांनी चोरीचा छडा लावण्याचे आदेश दिले होते. त्यानुसार उपविभागीय अधिकारी विक्रम कदम यांचे मार्गदर्शनाखालील पथकाने घटनास्थळ व आजूबाजूच्या परिसरातील ठिकाणचे सीसीटीव्ही फुटेज तपासले आणि गुन्ह्यात वापरलेल्‍या वाहनाची ओळख पटवून वाहन मालकाचा शोध लावला. तसेच, तांत्रिक तपासाद्वारे झुबेर शेखला अटक केली. झुबेरच्या चौकशीत गुन्ह्यातील अन्य साथीदारांची माहिती मिळाली. त्‍यानुसार खोपोलीतील पोलिस पथक पुणे, नाशिक व गुजरात रवाना झाले आणि त्‍यांनी तीन आरोपींना ताब्यात घेतले. तर एका आरोपीला शिळफाटा परिसरातून अटक केली. चोरीतील मुद्येमाल सिराउजदीन खान याला विकल्याचे झुबेरने पोलिसांना सांगितले. त्‍यानुसार पोलिसांनी तीन लाख २० हजार पाचशे रुपये किमतीचा सर्व मुद्देमाल आणि गुन्ह्यात वापरलेली वाहने जप्त केली.

खालापूर ः चोरी प्रकरणातील आरोपींना अटक करण्यात आली.