बाजारात पावसाळी आंब्यांची मागणी वाढली

बाजारात पावसाळी आंब्यांची मागणी वाढली
तुर्भे, ता. १२ (बातमीदार ) : वाशीतील घाऊक फळ बाजारात सध्या पावसाळी आंब्यांचा हंगाम सुरू आहे. त्यामुळे बाजारात वेगवेगळ्या राज्यांतून येणारे वेगवेगळ्या जातीचे आंबे पाहायला मिळत आहेत. यात दक्षिण भारतातील आंब्याबरोबर आता उत्तर भारतातील आंबे सर्वांचे लक्ष वेधून घेत आहेत. विशेष म्हणजे या आंब्यांचे दरही आवाक्यात आहेत. त्यामुळे बाजारात सध्या या आंब्यांची चलती पाहायला मिळत आहे.
उन्हाळा हा महाराष्ट्रातील आंब्यांचा हंगाम मानला जातो. पाऊस सुरू झाला की आपल्याकडील आंब्यांचा हंगाम संपतो. यावर्षी पाऊस लवकर आला आणि आंब्यांचा हंगामही लवकर संपला. पाऊस सुरू झाल्यापासून पावसाळी आंब्यांचा हंगाम बाजारात सुरू झाला आहे. दक्षिण भारताबरोबर आता उत्तर भारतातील आंबे बाजारात येण्यास सुरुवात झाली आहे. पावसाळी आंब्यांचा हंगाम सध्या तेजीत आहे, अशी माहिती व्यापारी रामबशिष्ठ जयस्वाल यांनी दिली.

आंब्यांचे दर आवाक्यात
१. उत्तर भारतातील उत्तर प्रदेश, बिहारमधून सध्या बाजारात दशहरी, लंगडा, चौसा या जातींच्या आंब्यांची आवक मोठ्या प्रमाणात होत आहे. त्यांचे दरही आवाक्यात आहेत. घाऊक बाजारात दशहरी ४०-७० रुपये किलो आहे, तर चौसा ६०-८० रुपये प्रतिकिलो आहे. लंगडा ३०-६५ रुपये प्रतिकिलो आहे. किरकोळ बाजारात हे आंबे १०० रुपये प्रतिकिलोने मिळत असल्याने सर्वसामान्यांच्या खिशाला परवडत आहेत.

२. दक्षिण भारतातून, कर्नाटक, केरळमधून तोतापुरी आंब्यांची सर्वाधिक आवक होत आहे. आवक जास्त असल्याने त्याचे दर २०-३० रुपये प्रतिकिलो घाऊक बाजारात आहेत. तर नीलम २५-३५ रुपये प्रतिकिलो दराने उपलब्ध आहे. यामुळे किरकोळ बाजारात तोतापुरी ५०-६० रुपये प्रतिकिलोने घाऊक बाजारात मिळत आहे. नीलम ६०-७० रुपये प्रतिकिलोने उपलब्ध आहे. आंब्यांचे दर आवाक्यात असल्याने या पावसाळी आंब्यांना बाजारात चांगला उठावही मिळत आहे.