अपघाताने रोखला तासभर घोडबंदर रोड

अपघाताने तासभर रोखला घोडबंदर रोड
टँकरचालक जखमी
सकाळ वृत्तसेवा
ठाणे, ता. १२ : बॉयलर ऑइल घेऊन सिन्नरला निघालेल्या चालकाचे टँकरवरील नियंत्रण सुटल्याने तो वाघबीळ, पंचामृत बस स्टॉपजवळील रस्त्यालगत उभ्या असलेल्या ट्रकला मागून जोरात धडकला. या अपघातात टँकरचालक राकेशकुमार (२८) हा टँकरच्या केबिनमध्ये अडकला होता. त्याला अवघ्या २० मिनिटांत बाहेर काढण्यात अग्निशमन दलाच्या जवानांना यश आले. त्याच्या दोन्ही पायांना दुखापत झाल्याने त्याला ठाणे महापालिका छत्रपती शिवाजी महाराज रुग्णालयात उपचारासाठी दाखल केले आहे. ही घटना शनिवारी (ता. १२) पहाटे सव्वाचारच्या सुमारास घडली. या अपघाताने जवळपास तासभर ठाण्याकडून घोडबंदर रोडकडे जाणारा रस्ता वाहतुकीसाठी मोकळा करण्यात आला.

टँकरचालक राकेशकुमार हा शिवडी येथून ३२ हजार लिटर बॉयलर ऑइल घेऊन घोडबंदर रोडने सिन्नरला निघाला होता. तो वाघबीळ परिसरात येताच त्याचे टँकरवरील नियंत्रण सुटले. याचदरम्यान ठाण्याकडून घोडबंदरकडे जाणाऱ्या रोडवरील पंचामृत बस स्टॉपजवळ ट्रकचालक सीताराम ओहोळ हे पनवेल येथून सुरत येथे १० टन लाकूड घेऊन जात होते. त्या वेळी ट्रक ब्रेकडाऊन झाल्यामुळे त्यांनी रस्त्यालगत ट्रक उभा केला होता. त्या ट्रकला पाठीमागून टँकरने जोरात धडक दिली. ही धडक इतकी जोरात होती, की त्यामुळे टँकरच्या केबिनचे मोठ्या प्रमाणात नुकसान झाले. शिवाय चालक त्या केबिनमध्ये अडकला होता.

कासारवडवली पोलिस कर्मचारी मालवीया यांनी ठाणे महापालिका आपत्ती व्यवस्थापन कक्षाला माहिती दिली. या घटनेची माहिती मिळताच घटनास्थळी कासारवडवली पोलिस, अग्निशमन दल आणि आपत्ती व्यवस्थापन या विभागांच्या अधिकारी आणि कर्मचाऱ्यांनी धाव घेतली. त्यांनी अडकलेल्या चालकाला अवघ्या २० मिनिटांत बाहेर काढून तत्काळ उपचारासाठी रुग्णालयात दाखल केले. त्यावेळी डॉक्टरांनी त्याच्या दोन्ही पायांना गंभीर दुखापत झाल्याचे सांगितले.

बॉयलर ऑइल सुरक्षित
अपघातग्रस्त टँकरमध्ये असलेले बॉयलर ऑइल सुरक्षित असून, त्यामुळे कोणताही धोका नसल्याचे सांगण्यात येत आले. तर घटनास्थळी अपघातग्रस्त टँकर हायड्रा मशीनच्या सहाय्याने सुमारे ४० मिनिटांच्या प्रयत्नानंतर रोडच्या एका बाजूला केला. या अपघाताने ठाण्याकडून घोडबंदर रोडकडे जाणारी वाहतूक सुमारे ४० मिनिटे धीम्या गतीने सुरू होती. घटनास्थळी अपघातग्रस्त वाहन रस्त्याच्या एका बाजूला केले असून, तो रस्ता वाहतुकीसाठी पूर्णपणे मोकळा केला आहे. या वेळी एक हायड्रा मशीन, एक फायर इंजिन, एक रेस्क्यू वाहन, एक रुग्णवाहिका आणि एक पिकअप वाहन पाचारण केल्याची माहिती आपत्ती व्यवस्थापन अधिकाऱ्यांनी दिली.