शाळेसमोर गतिरोधक उभारण्याची मागणी

शाळेसमोर गतिरोधक उभारण्याची मागणी
कांदिवली, ता. १२ (बातमीदार) ः मालाड द्रुतगती महामार्गावर बाळ डोंगरी येथील सेंड फ्रान्सिस इंग्लिश शाळेसमोर गतिरोधक उभारावे, अशी मागणी पालक करीत आहेत. या शाळेसमोर मुख्य मार्ग व सिग्नल चौक आहे. या मार्गावर मोठ्या प्रमाणात वाहतूक असते. त्यातच बाजूला सिग्नल चौक असल्याने पालकांसह विद्यार्थ्यांना जीव मुठीत घेऊनच येथून जावे लागते. पालिकेने या मार्गावर गतिरोधक बसवावा, अशी मागणी पालकांकडून केली जात आहे. या शाळेमध्ये एक हजार विद्यार्थी शिक्षण घेत असून शाळा भरण्याच्या आणि सुटण्याच्या वेळेत पालकांसह विद्यार्थ्यांची मोठ्या प्रमाणात वर्दळ असते. त्‍यामुळे एखादी दुर्घटना टाळण्यासाठी गतिरोधक बसवण्याची आवश्‍यकता असल्‍याचे पालकांनी सांगितले.