उल्हासनगरमध्ये एमआयडीसी गुरुत्ववाहिनीला गळती

उल्हासनगर, ता १२ (वार्ताहर) : उल्हासनगरचा मुख्य जलवाहिनी स्रोत असलेल्या महाराष्ट्र औद्योगिक विकास महामंडळाच्या (एमआयडीसी) बारवी गुरुत्ववाहिनी क्रमांक दोनमध्ये कोळेगाव येथे शुक्रवारी (ता. ११) मध्यरात्री मोठी गळती झाल्यामुळे संपूर्ण पाणीपुरवठा यंत्रणा कोलमडली आहे. जलवाहिनी फुटल्याने दुरुस्तीची कामे तातडीने हाती घेण्यात आली आहे. मात्र, पाले टॅपिंग आणि फॉरेस्ट नाका टॅपिंगवरून होणारा पाणीपुरवठा पुढील सूचना येईपर्यंत पूर्णतः बंद राहणार आहे.
उल्हासनगर महापालिकेच्या पाणीपुरवठा विभागाने दिलेल्या माहितीनुसार
जलवाहिनी फुटल्याची घटना मध्यरात्री उशिरा घडली. त्यानंतर तत्काळ एमआयडीसी आणि महापालिकेच्या यंत्रणांनी दुरुस्तीचे काम युद्धपातळीवर सुरू केले आहे. ही गळती मोठ्या प्रमाणावर असल्याने काम पूर्ण होण्यास वेळ लागणार आहे. तोपर्यंत नागरिकांना पाणीटंचाईला सामोरे जावे लागणार आहे. विशेष म्हणजे, दुरुस्ती पूर्ण झाल्यानंतरही काही काळासाठी कमी दाबाने पाणीपुरवठा होण्याची शक्यता आहे. यासाठी नागरिकांनी पुरेसा पाणीसाठा करून ठेवावा; तसेच आवश्यकतेनुसारच पाण्याचा वापर करावा, असे आवाहन करण्यात आले आहे. दरम्यान, पालिकेने परिस्थितीवर लक्ष ठेवले असून, दुरुस्ती पूर्ण होताच पाणीपुरवठा सुरळीत करण्याचे आश्वासन दिले आहे. तोपर्यंत नागरिकांनी संयम बाळगावा आणि पालिकेच्या अधिकृत सूचनांकडे लक्ष द्यावे, असे आवाहन करण्यात आले आहे.