किराणा दुकानातून रोख रक्कम लंपास

उल्हासनगर, ता. १२ (वार्ताहर) : उल्हासनगरातील एका किराणा दुकानावर शुक्रवारी (ता. ११) दुपारी चोरट्यांनी केवळ काही मिनिटांत ५३ हजार रुपयांची रोकड लंपास केली. ही संपूर्ण घटना सीसीटीव्ही कॅमेऱ्यात कैद झाली असून, पोलिसांनी तपासाची चक्रे वेगात फिरवली आहेत.
उल्हासनगर शहरातील कॅम्प क्रमांक ५ मधील सह्याद्रीनगर परिसरात भरदिवसा एका किराणा दुकानातून तब्बल ५३ हजार रुपयांची रोख रक्कम चोरण्यात आली आहे. पवन बजाज यांचे सह्याद्रीनगर परिसरात किराणा दुकान असून नेहमीप्रमाणे त्यांनी सकाळच्या सुमारास दुकान उघडले होते. त्याच दरम्यान एक दुचाकीस्वार तरुण आणि त्याचा साथीदार दुकानात आले. त्यांनी काही किराणा वस्तू खरेदी करण्याच्या बहाण्याने दुकानदाराला बोलण्यात गुंतवले. दुसऱ्या क्षणी एकाने संधी साधून दुकानाच्या काउंटरमागे शिरला आणि रोख ५३ हजार रुपये लंपास करत लगेच पोबारा केला. काही क्षणांतच हे तिघेही दुचाकीवरून पसार झाले. दुकानदाराला पैसे न दिसल्याने सीसीटीव्ही फुटेज तपासले. त्या वेळी ही संपूर्ण चोरी उघडकीस आली. दरम्यान, हिललाइन पोलिस ठाण्यात गुन्हा दाखल झाला असून सीसीटीव्ही फुटेजच्या आधारे आरोपींचा शोध सुरू आहे. दुकान परिसरातील इतर सीसीटीव्ही कॅमेरे आणि स्थानिक लोकांकडून माहिती घेतली जात आहे.