दोन सोनसाखळी चोरांना बेड्या

अंबरनाथ, ता. १२ (वार्ताहर) : अंबरनाथमध्ये पोलिसांनी सोनसाखळी खेचून पळ काढणाऱ्या दुचाकीचालकांना पोलिसांनी बेड्या ठोकल्या आहेत. त्यांच्याकडून दोन गुन्ह्यांची उकल करत चोरलेला मुद्देमालही हस्तगत केला आहे. या दोघांनी झटपट पैसे कमावण्यासाठी या चोऱ्या केल्याची कबुली दिली आहे.
अंबरनाथमध्ये लोटस तलाव येथे मॉर्निंग वॉक करून घरी परतणाऱ्या महिलेचे मंगळसूत्र खेचून नेल्याची घटना २ जुलैला घडली होती. दुचाकीवरून आलेल्या दोघांनी महिलेच्या गळ्यातील सोन्याचे मंगळसूत्र खेचून पसार झाले. याचा तपास अंबरनाथ पोलिस घेत होते. अखेर या गुन्ह्याच्या तपासात पोलिसांनी जय ग्यानचंदानी (वय २७) आणि जितेंद्र कांबळे (वय ३०) या दोघांना डोंबिवली येथून मोठ्या शिताफीने अटक केले. या वेळी त्यांनी अंबरनाथसह ठाकुर्लीत एक सोनसाखळी चोरल्याची कबुली दिली. या दोघांकडून १४ ग्रॅम वजनाचे सोन्याचे दागिने, एक दुचाकी असा सुमारे दोन लाख दहा हजारांचा मुद्देमाल हस्तगत केला. त्यांनी आणखी कुठे गुन्हे केले आहेत का? याचा तपास पोलिसांकडून सुरू असल्याची माहिती उपायुक्त सचिन गोरे यांनी दिली. ही कारवाई पोलिस आयुक्त आशुतोष डुंबरे, सहआयुक्त ज्ञानेश्वर चव्हाण, अपर पोलिस आयुक्त संजय जाधव, उपायुक्त सचिन गोरे, सह पोलिस आयुक्त शैलेश काळे यांच्या मार्गदर्शनाखाली वरिष्ठ पोलिस निरीक्षक किशोर शिंदे, सह पोलिस निरीक्षक विजय काजारी, पोलिस हवालदार संजय चव्हाण, दत्ता जाधव, हेमंत पाटील, मंगेश सूर्यवंशी, मुरलीधर गवळी, अर्जुन मोरे, प्रशांत चव्हाण यांनी केली.