गारेगार प्रवासाला ब्रेक

केडीएमटीच्या एसी बस बंद
कल्याण, ता. १२ (वार्ताहर) : कल्याण-डोंबिवलीत धावणाऱ्या केडीएमटीच्या अत्याधुनिक एसी बस नो विमा, नो पासिंग या कारणांनी अचानक बंद झाल्या आहेत. त्यामुळे प्रवाशांना पुन्हा एकदा रिक्षाचालकांच्या लूटमारीचा सामना करावा लागत आहे. एकीकडे नवी मुंबई, ठाणे, परिवहनच्या एसी बस नियमित कल्याण- डोंबिवलीत सेवा देत आहेत; मात्र केडीएमटी आपल्या सेवा सुधारण्याबाबत उदासीन असल्याने प्रवासी नाराजी व्यक्त करीत आहेत.

राष्ट्रीय स्वच्छ हवा मिशनअंतर्गत तब्बल ९९ कोटी रुपयांचा निधी मंजूर करून २०७ इलेक्ट्रिक एसी बस खरेदीचा डंका कल्याण- डोंबिवली महापालिकेकडून पिटण्यात आला होता. कल्याण- डोंबिवली महापालिकेची परिवहन सेवा सुधारण्यासाठी राष्ट्रीय स्वच्छ हवा मिशन उपक्रमातून २०७ इलेक्ट्रिक एसी बस खरेदीसाठी ९९ कोटींचा निधी उपलब्ध करून देण्यात आला होता. या निधीतून केडीएमटीने मे. कॉसीस मोबिलिटी सर्व्हिसेस आणि बुथेलो प्रायव्हेट लिमिटेड या दोन कंत्राटदारांची नियुक्ती करीत त्यांच्या माध्यमातून मोठ्या मिडी आणि मिनी अशा २०७ बसची खरेदी केली.

जर्मनी बनावटीच्या अत्याधुनिक युरो बस शहरात प्रवाशांना गारेगार सेवा देणार असल्याचे स्वप्न या वेळी परिवहन विभागाकडून दाखविण्यात आले होते; मात्र प्रत्यक्षात या कंपनीची बसनिर्मितीची क्षमताच नसल्याने पहिल्या १० बस बनवतानाच कंपनीला घाम फुटला. पुढील बस तयार करण्यास असमर्थता दाखवत कंपनीने कशाबशा आठ बस अडीच वर्षांच्या प्रतीक्षेनंतर पुरवल्या. कोसिस मोबिलिटी आणि बुथेलो प्रायव्हेट लिमिटेड या दोन कंपन्यांकडे एसी बसचा ठेका दिला; पण त्यांची तितकी निर्मिती क्षमता नसल्याने केडीएमटी प्रशासन पुन्हा एकदा तोंडावर आपटले आहे.

आगारातच उभ्या
जर्मनी बनावटीच्या युरो टेक्नॉलॉजी बस कल्याण-डोंबिवलीत दाखल होणार, प्रवाशांना गारेगार सेवा मिळणार, असे प्रशासनाकडून सांगण्यात आले होते; मात्र प्रत्यक्षात प्रवाशांच्या पदरी निराशाच पडली. केडीएमटीच्या ताफ्यात केवळ आठ बस अडीच वर्षांच्या प्रतीक्षेनंतर दाखल झाल्या. त्यापैकी चार बस काही महिन्यांतच बंद पडल्या. तर उर्वरित चार बस विमा नूतनीकरणाच्या फेऱ्यात अडकून शेवटी आगारात उभ्या आहेत. केडीएमटीचे व्यवस्थापक डॉ. विजयकुमार द्वासे यांनी याबाबत म्हटले, की वातानुकूलित बसचा विमा भरला नसल्याने रस्त्यावर या बसचे रस्त्यावर संचालन होऊ शकले नाही. या वातानुकूलित बसचा विमा काढण्याबाबत सांगितले आहे.