जियो टॉवरमधील चोरीप्रकरणी मोक्‍का कारवाई

जिओ टॉवरमधील चोरीप्रकरणी मकोका कारवाई
टोळीचा पर्दाफाश; ५६ लाखांचा मुद्देमाल जप्त
नवी मुंबई, ता. १२ (वार्ताहर) : नवी मुंबई पोलिसांच्या मध्यवर्ती गुन्हे शाखेने जिओ कंपनीच्या मोबाईल टॉवरवरील फायजी (5G) बेसबँड युनिट चोरणाऱ्या टोळीचा पर्दाफाश करीत चार आरोपींना अटक केली आहे. या कारवाईत टोळीने वेगवेगळ्या ठिकाणी केलेले एकूण १३ गुन्हे उघडकीस आले आहेत. तब्बल ५६ लाख रुपयांचा मुद्देमाल जप्त करण्यात आला आहे. या टोळीने संघटितपणे गुन्हे केल्याने त्यांच्यावर बीएनएस ११२ मकोकाअंतर्गतदेखील गुन्हा दाखल करण्यात आला आहे.
या कारवाईत अटक केलेल्या आरोपींमध्ये मधुकर रमेश गायकवाड (२९), अभिषेक दीपक काकडे (२४), सौरभ सतीश मंजुळे (२४) आणि दानिश इरशाद मलिक (२२) या चौघांचा समावेश आहे. या आरोपींनी २६ जून ते ६ जुलैदरम्यान खांदेश्वर, तळोजा आणि पनवेल परिसरात जिओ टॉवरवरील बेसबँड युनिटची चोरी केली होती.
गुन्हा दाखल झाल्यानंतर गुन्हे शाखा मध्यवर्ती कक्षाने या प्रकरणाचा तपास सुरू केला होता. सहाय्यक पोलिस आयुक्त (गुन्हे) अजयकुमार लांडगे यांच्या मार्गदर्शनाखाली मध्यवर्ती कक्षाचे वरिष्ठ पोलिस निरीक्षक सुनील शिंदे आणि त्यांच्या पथकाने तांत्रिक विश्लेषण व सीसीटीव्ही फुटेजच्या आधारे आरोपींचा शोध घेतला.
आरोपी हे मालेगाव, सटाणा आणि परभणी येथील असल्याचे निष्पन्न झाले. त्यानंतर गुन्हे शाखेने ८ जुलै रोजी मुंबई-आग्रा हायवेवर पडघा परिसरात सापळा रचून तीन आरोपींना ताब्यात घेतले. तर चौथ्या आरोपीला सटाणा (नाशिक) येथून ताब्यात घेऊन अटक केली. न्यायालयाने या चारही आरोपींना ११ जुलैपर्यंत पोलिस कोठडी ठोठावली आहे. गुन्हे शाखेने या चौकडीकडून १२ बेस बँड युनिट्स, तीन मोबाईल, तीन वाहने असा तब्बल ५६ लाख रुपये किमतीचा मुद्देमाल हस्तगत केला आहे.

महामुंबई परिसरात १३ गुन्हे
या कारवाईत अटक करण्यात आलेल्या आरोपींनी नवी मुंबई, मिरा भाईंदर, ठाणे ग्रामीण, रायगड, ठाणे शहर आणि मुंबई पोलिस आयुक्तालयांत १३ गुन्हे केल्याचे उघडकीस आले आहे. आरोपी मधुकर गायकवाड आणि त्यांच्या साथीदारांनी मिळून संघटितपणे गुन्हेगारी कट रचून हे गुन्हे केल्याचे तपासात निष्पन्न झाले. त्यामुळे बीएनएस-११२ प्रमाणे कलम वाढवण्यात आले आहे.