कोर्लई समुद्रकिनाऱ्यावरील सापडला संशयित बोया

कोर्लई समुद्रकिनाऱ्यावर सापडला संशयित बोया
अलिबाग, ता. १२ (वार्ताहर) : मुरूड तालुक्यातील कोर्लई समुद्रकिनारी मासेमारीसाठी वापरल्या जाणाऱ्या संशयित बोयाने सर्व यंत्रणांची झोप उडविली होती. अखेर सहा दिवसांच्या प्रयत्नानंतर शुक्रवारी (ता. ११) सायंकाळी सव्वासहा वाजण्याच्या सुमारास हा बोया शोध मोहिमेदरम्यान सापडला. हा संशयित बोया तटरक्षक दलाकडे सुपूर्द करण्यात आला आहे. त्यामुळे संबंधित शोधमोहीम पोलिसांनी थांबविल्याची माहिती पोलिस अधीक्षक आँचल दलाल यांनी दिली. गेल्या सहा दिवसांपासून रायगडच्या रेवदंडा, अलिबाग, मुरूड, कोर्लई, मांडवा समुद्रकिनाऱ्यावर पोलिस आणि इतर सागरी सुरक्षा यंत्रणा विविध यंत्रणांच्या साह्याने समुद्रातून वाहून आलेल्या या संशयित फिशिंग बोयाचा शोध घेत होते. शोधपथकाला अखेर हा बोया शुक्रवारी कोर्लई समुद्रकिनाऱ्यावर सापडला. हा बोया सौरऊर्जेवर काम करीत असल्याने तो सूर्यकिरणांनी चार्ज होत असे, त्यामुळे सतत जागा बदलल्याने त्याचा शोध घेण्यास वेळ लागल्याचे पोलिसांनी सांगितले.