गुरुपौर्णिमा

के. आ. बांठिया माध्यमिक विद्यालयात गुरुपौर्णिमा उत्साहात
पनवेल, ता. १२ ः महर्षी वेदव्यास यांचा जन्मदिन म्हणजे आषाढ शुद्ध पौर्णिमा ही गुरुपौर्णिमा म्हणून ओळखली जाते. महर्षी वेदव्यास यांनी घोर तपश्चर्येनंतर वेद, पुराणे, महाभारत यांची रचना केली. म्हणून त्यांना आद्यगुरू संबोधले जाते. ही गुरुपौर्णिमा के. आ. बांठिया माध्यमिक विद्यालयात मोठ्या उत्साहात साजरी झाली.
विद्यालयाचे प्राचार्य माळी, उपप्राचार्य आंब्रे, ज्येष्ठ पर्यवेक्षक महाजन, पर्यवेक्षक गोखले, पर्यवेक्षिका वेलणकर, सांस्कृतिक प्रमुख व गुरुपौर्णिमा कार्यक्रमाचे नियोजक टी. एस. पाटील, ए. ए. गोखले, पी. एस. शाह यांच्या हस्ते महर्षी व्यास यांच्या प्रतिमेचे पूजन केले. सुधागड एज्युकेशन सोसायटीचे संस्थापक अध्यक्ष दादासाहेब लिमये आणि केशरचंद आनंदराम बांठिया यांच्या मूर्तीचे पूजन करून कार्यक्रमाला सुरुवात झाली.
‘गुरू हा संत कुळीचा राजा, गुरू हा प्राण विसावा माझा’ हे समजून घेत प्राप्ती गावंड व लक्ष्मी बोडके यांनी मनोगत व्यक्त केले. सद्गुरूसारखा असता पाठीराखा इतरांचा लेखा कोण करी, याची जाणीव ठेवून माळी यांनी विद्यालयातील शिक्षकांचा यथोचित सत्कार केला. अरुणी आणि धौम्य ऋषी, अर्जुन, एकलव्य आणि द्रोणाचार्य अशा गुरू-शिष्यांच्या उदाहरणांनी आपल्या प्राचीन संस्कृतीचा इतिहास उजळून गेलेला आहे. अनेक शिष्यांनी गुरुभक्तीचे आदर्श घालून दिले आहेत. आपणही हेच व्रत आचरणात ठेवणे आणि जोपासणे महत्त्वाचे आहे, हे सांगणारे मौलिक मार्गदर्शन मुख्याध्यापक माळी यांनी केले.
प्रत्येक वर्गात गुरुपौर्णिमेचा कार्यक्रम उत्साहात साजरा केला. आपल्या गुरूंना पेन, फुलं गुरुदक्षिणा म्हणून विद्यार्थ्यांनी दिले.