ओव्हरहेड वायरचा संपर्कात आलेल्या तरुणाचा मृत्यू

ओव्हरहेड वायरच्या संपर्कात आलेल्या तरुणाचा मृत्यू

नवी मुंबई, ता. १२ (वार्ताहर) : रेल्वे गाडीवर चढून रील बनविताना ओव्हरहेड वायरचा धक्का बसून गंभीररीत्या भाजलेल्या १६ वर्षीय आरव श्रीवास्तव या तरुणाचा शनिवारी (ता. १२) सकाळी उपचारादरम्यान मृत्यू झाला. आरव याच्यावर ऐरोली येथील बर्न सेंटर हॉस्पिटलमध्ये उपचार सुरू होते.

आरव श्रीवास्तव हा तरुण बेलापूर येथे राहण्यास होता. तो सीवूड्स येथील डीपीएस शाळेमध्ये इयत्ता अकरावीत शिक्षण घेत होता. हार्बर रेल्वे मार्गावर रविवारी (ता. ६) मेगाब्लॉक असल्याने या मार्गावर दुरुस्तीचे काम सुरू होते. या वेळी कचरा वाहतूक करणारी गाडी नेरूळ आणि जुईनगर रेल्वेस्थानकांदरम्यान उभी होती. या ठिकाणी आरव त्याच्या पाच ते सहा मित्रांसह गेला होता. या वेळी आरव या रेल्वे गाडीवर चढून रील बनवत होता. या वेळी तो ओव्हरहेड वायरच्या संपर्कात आल्याने त्याला जोरदार धक्का बसला. यामध्ये तो गंभीररीत्या भाजला गेला आणि रेल्वे गाडीवरून खाली पडल्याने त्याच्या डोक्याला गंभीर दुखापत झाली. आरववर ऐरोली येथील बर्न सेंटर हॉस्पिटलमध्ये गेल्या पाच दिवसांपासून उपचार सुरू होते. अखेर शनिवारी सकाळी त्याचा मृत्यू झाल्याची माहिती वाशी रेल्वे पोलिस ठाण्याचे वरिष्ठ पोलिस निरीक्षक किरण उंदरे यांनी दिली. आरव श्रीवास्तव हा मुलगा रेल्वे गाडीवर रील बनवण्यासाठी चढला नव्हता, तर तो कुतूहलापोटी त्या गाडीवर चढला होता. या वेळी त्याला शॉक लागल्याने तो गंभीरीत्या भाजला होता, असेही उंदरे यांनी सांगितले.