नायगावमध्ये विजेचा झटक्याने १५ वर्षीय मुलाचा मृत्यू

नायगावमध्ये विजेचा झटक्याने १५ वर्षीय मुलाचा मृत्यू

बोळिंज, ता. १२ (बातमीदार) : नायगाव पश्चिमेच्या बीच कॉम्प्लेक्समध्ये बॅडमिंटनचा अडकलेला शटल कॉक काढण्यासाठी गेलेल्या १५ वर्षीय मुलाचा विजेच्या धक्क्याने मृत्यू झाला. ही घटना शुक्रवारी (ता. ११) सायंकाळी सात वाजण्याच्या सुमारास घडली. आकाश संतोष साहू असे मृताचे नाव आहे.
सोसायटीच्या आवारात शुक्रवारी सायंकाळी आकाश आणि त्याचे तीन-चार मित्र बॅडमिंटन खेळत होते. या वेळी बॅडमिंटनचे शटल कॉक हे पहिल्या माळ्यावरील सज्जावर अडकले होते. ते काढण्यासाठी आकाश वर चढला; मात्र त्या ठिकाणी असलेल्या वातानुकूलित यंत्राच्या वायरच्या संपर्कात आल्याने तो जोरदार धक्का लागून खाली कोसळला. त्याला तातडीने उपचारासाठी रुग्णालयात दाखल करण्यात आले, मात्र त्यापूर्वीच त्याचा मृत्यू झाला. ही घटना सीसीटीव्हीमध्येही कैद झाली आहे. आकाश हा सेंट झेविअर हायस्कूलमध्ये इयत्ता दहावीत शिकत होता. या घडलेल्या दुर्घटनेमुळे कॉलनी परिसरात शोककळा पसरली आहे. दरम्यान, या सोसायटीच्या संबंधित पहिल्या माळ्यावर राहत असलेल्या गृहस्थांनी त्यांच्या वातानुकूलित यंत्रामधून विद्युत प्रवाह बाहेर येत असल्याचे माहीत असतानाही त्याकडे दुर्लक्ष केले. या निष्काळजीपणामुळे आकाशचा मृत्यू झाल्याचा आरोप येथील नागरिकांनी केला आहे. याप्रकरणी माणिकपूर पोलिस ठाण्यात मृत्यूची नोंद करण्यात आली असून, पुढील तपास सुरू असल्याची माहिती पोलिसांनी दिली आहे.