भिवंडीत सुतार, चौकीदारावर प्राणघातक हल्ला

भिवंडीत सुतार, चौकीदारावर प्राणघातक हल्ला
चार जणांविरोधात गुन्हा दाखल
भिवंडी, ता. १२ (बातमीदार) : भिवंडी तालुक्यातील मुंबई-नाशिक महामार्गावरील बाबोसा कंपाउंडजवळ असलेल्या ऑरेंज मॉड्यूलर कंपनीत काम करणाऱ्या उत्तर भारतीय तरुणावर आणि कंपनीच्या चौकीदारावर सरवली येथे मंगळवार (ता. ८) रात्री चार अज्ञातांनी हल्ला केला. या हल्ल्यात दोघे गंभीर जखमी आहेत. हल्लेखोरांनी जखमींना परिसर सोडून जाण्याची धमकीही दिल्याचे सांगितले. याप्रकरणी कोनगाव पोलिसांत गुन्हा दाखल करण्यात आला आहे.
पोलिसांनी दिलेल्या माहितीनुसार, सतपाल रामदेव विश्वकर्मा (वय २८) हे मूळ उत्तर प्रदेशातील बलरामपूर येथील रहिवासी आहेत. मुंबई-नाशिक महामार्गावरील बाबोसा कंपाउंडजवळ असलेल्या ऑरेंज मॉड्यूलर कंपनीत ते सुतार म्हणून काम करतात. मंगळवारी रात्री सतपाल जेवणाची तयारी करताना चार अज्ञातांनी कंपनीत येऊन सुरक्षारक्षकासह सतपाल यांना शिवीगाळ आणि मारहाण करण्यास सुरुवात केली. या वेळी हल्लेखोरांनी विजयला उद्यापासून कामावर येऊ नको आणि इथे पुन्हा दिसू नको, अशी धमकीही दिली. या वेळी हल्लेखोरांनी सतपालवर काठ्यांनी हल्ला करून काचेचा दरवाजाही तोडला.
यामध्ये सतपाल आणि विजय हे गंभीर जखमी झाले असून अज्ञातांविरोधात कोनगाव पोलिसात तक्रार दाखल करण्यात आली आहे. या हल्ल्याला गांभीर्याने घेत पोलिसांनी अज्ञात आरोपींविरुद्ध गुन्हा दाखल करण्यात आला आहे. या घटनेचा तपास पोलिस उपनिरीक्षक रोहन गायकवाड करीत आहेत. या हल्ल्याच्या घटनेमुळे परिसरात काम करणाऱ्या स्थलांतरित मजुरांमध्ये भीतीचे वातावरण निर्माण होत आहे.