म्हारळ गाव धोक्याच्या छायेखाली

म्हारळ गावाला पुराचा धोका
टिटवाळा, ता. १३ (वार्ताहर): उल्हासनगर पालिकेच्या हद्दीतून जाणारा नाला अरुंद आणि अपुऱ्या क्षमतेचा असल्याने म्हारळ गावातील सूर्यानगर ते म्हारळ सोसायटी परिसरात दरवर्षी पावसाळ्यात पूरस्थिती निर्माण होते. यामुळे सुमारे ४०० ते ५०० कुटुंबांना दररोज जीव मुठीत धरून राहावे लागते. गावातील नाला १०-१२ फूट रुंद आहे; मात्र उल्हासनगर हद्दीत जाताना तो एल-आकारात केवळ दोन ते अडीच फूट रुंद होतो. ज्यामुळे पावसाचे पाणी वाहून न जाता उलट गावात परत येते. परिणामी, वॉर्ड क्रमांक ४ मधील अनेक घरे, शिवाजी नगर, राऊत वस्ती, प्रिती अकॅडमी शाळा, म्हारळ सोसायटी हे सर्व क्षेत्र प्रभावित होतात. या नाल्यातून येणाऱ्या पाण्यामुळे कल्याण-मुरबाड महामार्गसुद्धा दरवर्षी पाण्याखाली जातो आणि वाहतुकीस अडथळा निर्माण होतो.
पुराच्या समस्येविरोधात शिवसेना ठाकरे गटाचे म्हारळ शहरप्रमुख आणि ग्रामपंचायत सदस्य प्रकाश चौधरी यांनी आवाज उठवला आहे. त्यांनी कल्याण शहरप्रमुख धनंजय बोडारे यांच्या नेतृत्वाखाली पालिका अधिकाऱ्यांची भेट घेत नाल्याच्या रुंदीकरणाबाबत निवेदन दिले. अधिकारीवर्गाने यावर सकारात्मक प्रतिसाद दिला आहे; मात्र प्रत्यक्षात कृती शून्यच आहे. दरवर्षी पावसाळ्यात निर्माण होणाऱ्या संकटाने नागरिक आर्थिक व जीवितहानीच्या छायेत जगत आहेत. पालिका आयुक्त आणि लोकप्रतिनिधींनी आता तरी या गंभीर प्रश्नाकडे लक्ष द्यावे, अशी मागणी संतप्त ग्रामस्थांनी केली आहे.