शिवसेना (ठाकरे)-मनसेच्या वतीने टोल बंद आंदोलन

पडघा, ता. १३ (बातमीदार) : मुंबई-नाशिक महामार्गावरील खराब, सर्व्हिस रस्त्यांची तत्काळ दुरुस्ती करावी, रस्त्यालगत गटार बांधणे व पथदिवे बसवणे, पडघा-भादाणे रस्त्यावरील भुयारी मार्गात तुंबलेल्या पाण्याचा निचरा करणे, आवश्यक महामार्गावर भुयारी मार्ग तयार करणे, परिसरातील महामार्गावरील गावातील रस्ते दुरुस्त करून सर्व्हिस रस्ते तयार करणे, तळवली नाका येथील भुयारी मार्गाचे काम लवकर करणे, शेरेकर पाडा येथे जाण्यासाठी भुयारी मार्ग तयार करणे यांसह इतर मागण्यांसाठी १७ जुलैला शिवसेना ठाकरे गट, मनसे व इतर सामाजिक संघटनेच्या वतीने टोल बंद आंदोलन व मोर्चा काढण्यात येणार आहे. या संदर्भातील माहिती पडघा येथील भातगिरणी सभागृहात पार पडलेल्या पत्रकार परिषदेत देण्यात आली. या वेळी शिवसेना उपजिल्हाप्रमुख प्रकाश भोईर, मनसे भिवंडी जिल्हाप्रमुख शैलैश बिडवी, सामाजिक कार्यकर्ते भगवान सांबरे, ॲड. संदीप जाधव, उपतालुकाप्रमुख रघुनाथ पाटील, तळवली सोसायटीचे सभापती काशीनाथ शेलार उपस्थित होते. पोलिसांनी व प्रशासनाने कितीही दबाव आणला, तरी सनदशीर मार्गाने मोर्चा व टोल बंद आंदोलन होणारच, असे सांगून या आंदोलनात नागरिकांनी मोठ्या संख्येने सहभागी होण्याचे आवाहन करण्यात आले.