खंडोबा टेकडीसाठी पर्यावरणप्रेमी एकवटले

खंडोबा टेकडीसाठी पर्यावरणप्रेमी एकवटले
घाटकोपर, ता. १३ (बातमीदार) ः घाटकोपर पश्चिमेतील खंडोबा टेकडी परिसरात विकसकाकडून तीनशेहून अधिक झाडे तोडल्याच्या विरोधात आज (ता. १३) पर्यावरणप्रेमींनी एकत्र येत आपला रोष व्यक्त केला.
विकसकाविरोधात गुन्हा दाखल झाला असला तरी खंडोबा टेकडी परिसर कायमस्वरूपी संरक्षित असावी, या मागणीसाठी मोर्चा काढण्यात आला होता. घाटकोपर, भटवाडी, बर्वेनगर येथील तीन नंबर शाळेजवळून ही रॅली काढण्यात आली. या रॅलीत पर्यावरणप्रेमींसह डॉक्टर, सामाजिक कार्यकर्ते, राजकीय नेते, विद्यार्थी, नागरिक मोठ्या संख्येने सहभागी झाले होते. या घटनेच्या निषेधार्थ आंदोलकांनी जोरदार घोषणाबाजी केली. हातात फलक घेऊन नागरिक सहभागी झाले होते. पर्यावरणप्रेमींनी निसर्गावर आधारित कविता सादर केल्‍या.