शिक्षणासाठी गरीब विद्यार्थ्यांना आर्थिक पाठबळ!

बदलापूर, ता. १३ (बातमीदार) : बदलापुरातील शिवभक्त आदिवासी आश्रमशाळेतील दहावी परीक्षा उत्तीर्ण झालेल्या गुणवंत विद्यार्थ्यांना ब्लु चिप कंपनीच्या वतीने दिलासा देणारी शिष्यवृत्ती प्रदान करण्यात आली. या शाळेतील १० हुशार व मेहनती विद्यार्थ्यांची निवड करून त्यांना पुढील शिक्षणासाठी प्रत्येकी १० हजार रुपये इतकी शिष्यवृत्ती देण्यात आली. ही रक्कम त्यांच्यासाठी प्रेरणादायी ठरणारी आहे.
बदलापुरात बोराडपाडा, लव्हाळी या भागात आदिवासी वस्ती मोठ्या प्रमाणात आहे. या भागातील मुलांना शिक्षणासाठी जागृत करून शिक्षणाच्या प्रवाहात घेऊन येणे, यासाठी शिवभक्त शाळा संस्थेचे सचिव रमेश बुटेरे आणि इतर सहकाऱ्यांनी विशेष मेहनत घेतली. ‘ब्लु चिप’ कंपनीने सामाजिक उत्तरदायित्वाच्या जाणिवेतून पुढाकार घेऊन या शिष्यवृत्तीचा उपक्रम राबवला आहे. विद्यार्थ्यांच्या प्रोत्साहनामुळे त्यांना शिक्षणाची नवी दारे खुली होतील आणि आत्मविश्वासाने पुढे जाण्याची ऊर्जा मिळेल, असे ते म्हणाले. या वेळी शाळेचे सचिव रमेश बुटेरे, मुख्याध्यापिका सायली बुटेरे, शिक्षकवर्ग, विद्यार्थी, पालक उपस्थित होते. सर्वांनी ब्लु चिप कंपनीच्या उपक्रमाचे कौतुक केले. ही शिष्यवृत्ती केवळ आर्थिक मदत न राहता, शिक्षणप्रेमाची ठोस पावती आहे. या विद्यार्थ्यांनी जिद्द आणि चिकाटीने शिक्षण घेतले. ते पाहता ही मदत योग्य व्यक्तींपर्यंत पोहोचली आहे. ग्रामीण व आदिवासी भागातील विद्यार्थ्यांसाठी हा उपक्रम एक प्रेरणास्त्रोत ठरेल, यात शंका नाही, असे मत रमेश बुटेरे यांनी व्यक्त केले.