नवी

उड्डाणपुलाच्या उतारावर भरधाव दुचाकी घसरून दोन तरुणांचा मृत्यू

नवी मुंबई, ता. १७ (वार्ताहर) : नवी मुंबईतून ऐरोलीमार्गे अंधेरी येथे जात असलेल्या तरुणांची भरधाव दुचाकी घणसोलीतील उड्डाणपुलाच्या उतारावर घसरल्‍याने दोघांचा मृत्यू झाल्याची घटना मंगळवारी मध्यरात्री घडली. याप्रकरणी रबाळे एमआयडीसी पोलिस ठाण्यात नोंद करण्यात आली आहे.
शाहनवाज फारुक धोरावाला (३८) व सलमान इस्माईल खान (३२) हे दोघेही अनुक्रमे अंधेरी व जोगेश्वरी येथे राहात होते. मंगळवारी (ता. १५) दोघेही कामानिमित्त नवी मुंबईत आले होते. त्यानंतर दुचाकीवरून ऐरोलीमार्गे अंधेरी येथे जात होते. रात्री साडेबाराच्या सुमारास घणसोलीतील उड्डाणपुलावरून जाताना उतारावर भरधाव वेगात असलेली दुचाकी घसरली. अपघातात दोघेही दूरवर फरपटत जाऊन गंभीर जखमी झाले.
अपघाताची माहिती मिळताच रबाळे एमआयडीसी पोलिसांनी जखमींना वाशी येथील महापालिकेच्या रुग्णालयात दाखल केले, मात्र उपचारादरम्यान दोघांचा मृत्यू झाला. हे दोघे नवी मुंबईत कुठे आले होते, तसेच कुठे चालले होते, याबाबत अद्याप माहिती मिळाली नसल्याचे सहाय्यक पोलिस निरीक्षक स्वप्नील जुईकर यांनी सांगितले. याप्रकरणी निष्काळजीने वाहन चालवल्‍याने अपघात घडल्याचे आढळल्‍याने दुचाकी चालवणाऱ्या तरुणाविरोधात गुन्हा दाखल करण्यात आला आहे.
................

झाड उन्मळून पडल्याने वाहनाचे नुकसान
खारघर, ता. १७ (बातमीदार) : वादळी वाऱ्यामुळे झाड उन्मळून पडल्याने खारघर सेक्टर-१२ मध्ये एका वाहनाचे नुकसान झाल्याची घटना बुधवारी घडली. दोन-तीन दिवसांपासून मुसळधार पाऊस सुरू आहे. वादळी वाऱ्यामुळे खारघर परिसरात विविध भागात वाहनांचे मोठे नुकसान झाले. या वेळी भाजपचे पदाधिकारी प्रवीण बेरा, दीपक ठाकूर आणि हार्दिक पटेल आदींनी पालिकेच्या अधिकाऱ्यांना माहिती दिल्यावर कर्मचाऱ्यांनी वाहनावरील झाड बाजूला केले. दरम्यान, सेक्टर-१३ कडे जाणाऱ्या रस्त्यावरील झाडांच्या फांद्यांची छाटणी करावी, अशी मागणी रहिवाशांकडून होत आहे.

................