मुरबाड तालुक्यात विद्यार्थ्यांचे भवितव्य अडचणीत

मुरबाड, ता. १३ (बातमीदार) : ठाणे जिल्हा परिषदेतर्फे चालविण्यात येणाऱ्या मुरबाड तालुक्यातील ११ प्राथमिक शाळांतील विद्यार्थ्यांना शिकविण्यासाठी एकही कायमस्वरूपी शिक्षक नाही. उसनवारीने दुसऱ्या शाळेतील शिक्षक पाठविण्यात येत आहेत. यामुळे विद्यार्थ्यांचे शैक्षणिक भवितव्य अडचणीत आले आहे. सामाजिक कार्यकर्ते दिनेश जाधव यांनी ठाणे जिल्हा परिषदेचे शिक्षणाधिकाऱ्यांना याबाबत निवेदन देऊन आंदोलनाचा इशारा दिला आहे.
मुरबाड तालुक्यात ठाणे जिल्हा परिषदेच्या एकूण ३२९ शाळा आहेत. यापैकी नऊ केंद्रांतील ११ शाळांना एकही कायम शिक्षक नाही. या शाळांमध्ये सुमारे ३५० विद्यार्थी शिक्षण घेत आहेत, असे दिनेश जाधव यांनी दिलेल्या निवेदनात म्हटले आहे. मुरबाड तालुक्यात ठाणे जिल्हा परिषदेच्या प्राथमिक शाळांमध्ये मोजकेच शिक्षक असल्यामुळे विद्यार्थ्यांचे शैक्षणिक नुकसान होत आहे. त्यामुळे काही पालकांनी आपल्या मुलांना खासगी शाळेत दाखल केल्याचे समजते. याबाबत पालकांनी रिपब्लिकन सोशालिस्ट पार्टीचे ठाणे जिल्हा ग्रामीण अध्यक्ष दिनेश जाधव यांच्याशी संपर्क साधून खंत व्यक्त केली होती. त्यानुसार येत्या आठ दिवसांत या ११ शाळांना कायमस्वरूपी शिक्षक न दिल्यास पक्षाच्या वतीने या शाळेतील विद्यार्थ्यांना घेऊन पंचायत समिती मुरबाड येथे शाळा भरविण्यात येईल, असा इशारा जाधव यांनी प्रशासनाला दिला आहे.

शून्यशिक्षकी शाळांची नावे
जिल्हा परिषद प्राथमिक शाळा मोऱ्याचा पाडा केंद्र जांबूर्डे, ठाकूरवाडी केंद्र तळेखल, गेट वाडी केंद्र म्हसे, मुरबेवाडी केंद्र तळेगाव, बादल पाडा केंद्र नागाव, मादोशी, आळवे, खेड केंद्र वेळूक, पारद वाडी केंद्र टोकावडे , भोरंडे केंद्र खुटल बारागाव , इंदिरानगर केंद्र धसई.