वसई किल्ला जागतिक वारसा यादीत समाविष्ट करण्याची मागणी

विरार, ता. १३ (बातमीदार) : छत्रपती शिवाजी महाराजांच्या १२ ऐतिहासिक किल्ल्यांचा युनेस्कोच्या जागतिक वारसा यादीत समावेश झाला आहे. वसईचा ऐतिहासिक किल्ला सुमारे ११० एकर क्षेत्रफळामध्ये पसरलेला असून, मराठा, पोर्तुगीज, आणि इंग्रज इतिहासाचे साक्षीदार असलेला वारसास्थळ आहे. या किल्ल्याचा समावेश जागतिक वारसा यादीत करण्यासाठी प्रयत्न करावेत, अशी मागणी सामाजिक कार्यकर्ते नितीन म्हात्रे यांनी पुरातत्त्व विभागाकडे पत्राने केली आहे.

पोर्तुगीज सत्तेसाठी हा किल्ला केंद्रबिंदू होता. नरवीर चिमाजी आप्पांनी १७३९ मध्ये लढाई करून तो जिंकला. हा किल्ला अजूनही स्थापत्यशास्त्र, समुद्रकिनाऱ्यावरील संरक्षण यंत्रणा आणि ऐतिहासिक संदर्भांनी समृद्ध आहे. आजही अनेक पर्यटक, इतिहास संशोधक आणि स्थानिक लोक येथे भेट देतात, परंतु त्याच्या विकासासाठी सरकारकडून प्रयत्न अपुरे आहेत, असे या पत्रात म्हटले आहे. वसई किल्ला हा केवळ एक ऐतिहासिक वारसा नसून आपल्या संस्कृतीचा अभिमान व भविष्यकालीन पर्यटन केंद्र होऊ शकतो. त्यामुळे त्याच्या जागतिक पातळीवरील मान्यतेसाठी आपण त्वरित पावले उचलावीत, अशी विनंती केली आहे.