खासदार सुरेश म्हात्रे, मध्य रेल्वेचे महाव्यवस्थापकांची बैठक

किन्हवली, ता. १३ (बातमीदार) : भिवंडी लोकसभा कार्यक्षेत्रातील रेल्वे संबंधित अडचणी, सुरक्षितता आणि पायाभूत सुविधांचा अभाव यावर गंभीर व त्यावर उपाययोजना याविषयी चर्चा करण्यासाठी भिवंडी लोकसभा मतदारसंघाचे खासदार सुरेश म्हात्रे यांनी मध्य रेल्वेचे महाव्यवस्थापक धर्मवीर मीना यांची मुंबईतील दालनात भेट घेऊन सविस्तर चर्चा करत महत्त्वांच्या १६ मागण्यांचे निवेदन दिले.
भिवंडी लोकसभा कार्यक्षेत्रातील शहापूर भिवंडी ग्रामीण, भिवंडी पश्चिम, भिवंडी पूर्व, कल्याण पश्चिम व मुरबाड या सहाही विधानसभा मतदारसंघातील नागरिकांना मध्य रेल्वेच्या उपनगरी रेल्वे सेवेतून प्रवास करताना दररोज अनेक अडचणींचा सामना करावा लागतो. प्रवाशांना भेडसावणाऱ्या रेल्वेसंबंधी अडचणी, सुरक्षितता आणि पायाभूत सुविधांचा अभाव आणि काही उपाययोजना करण्यासाठी भिवंडी लोकसभा मतदारसंघाचे खासदार म्हात्रे यांनी मीना यांची छत्रपती शिवाजी महाराज टर्मिनस, मुंबई येथील दालनात भेट घेतली. तसेच विविध गावांमधील स्थानिक पातळीवरील समस्या आणि उपनगरी रेल्वे सेवा सुधारण्यासाठी १६ महत्त्वांच्या मागण्यांचे निवेदन दिले.