ठाण्यात दुकानाला आग

ठाणे, ता. १३ : मखमली तलाव परिसरातील मे. बाबा फॅन्स या दुकानाला आग लागल्याची घटना रविवारी (ता. १३) दुपारी १२च्या सुमारास समोर आली. या घटनेत त्या दुकानातील कागदी पुठ्ठ्याचे बॉक्स व इलेक्ट्रिक वायरिंग जळून किरकोळ नुकसान झाले आहे. मखमली तलाव येथील सुरुड टॉवर या इमारतीच्या तळमजल्यावर हे दुकान आहे. त्या दुकानाला आग लागल्याची माहिती नौपाडा पोलिस कर्मचारी आव्हाड यांनी महापालिका आपत्ती व्यवस्थापन कक्षाला दिली. तातडीने नौपाडा पोलिसांसह आपत्ती व्यवस्थापन आणि अग्निशमन दलाच्या जवानांनी धाव घेतली. तातडीने आगीवर नियंत्रण मिळवण्यात यश आल्याने दुकानाचे किरकोळ नुकसान झाले आहे. तसेच या घटनेत कोणालाही दुखापत झाली नसल्याची माहिती ठामपा आपत्ती व्यवस्थापन कक्षाने दिली.