आश्रमशाळांमध्ये बालसंरक्षण प्रणाली

शहापूर (वार्ताहर) : तालुक्यातील आदिवासी विकास विभागाच्या आश्रमशाळांमधील विद्यार्थ्यांसाठी बालसंरक्षण प्रणाली राबविण्यात येत आहे. यासाठी दिशा संस्थेने पुढाकार घेतला आहे. यानिमित्ताने शेणवे विभागातील कुल्हे आश्रमशाळेत विस्तृत प्रकल्प-ओळख अभ्यासवर्ग आणि क्षमता बांधणी प्रशिक्षण घेण्यात आले.
मुख्याध्यापक, बाल संरक्षण संपर्क अधिकारी आणि वसतिगृह अधीक्षकांना बाल संरक्षणाच्या आवश्यक संकल्पना आणि कायद्यांवर लक्ष केंद्रित करून यावेळी मार्गदर्शन करण्यात आले. याप्रसंगी आदिवासी विकास विभागाचे सहाय्यक प्रकल्प अधिकारी दिवाकर काळपांडे, विस्तार अधिकारी रवींद्र घोलप, शारदा पोकळा, दिशा संस्थेचे संचालक ॲड. प्रवीण खांडपासोळे उपस्थित होते. हा उपक्रम ठाणे जिल्ह्यातील सर्वच आश्रमशाळांमध्ये घेण्यात येणार असून, आदिवासी विद्यार्थ्यांसाठी संरक्षणात्मक वातावरणामुळे तयार होईल, असे संस्थेच्या वतीने सांगण्यात आले.