खालापूरमध्ये दोन अपघातात तीन ठार

खालापूरमध्ये दोन अपघातांत तीन ठार
अंडा पॉइंटजवळ ट्रकचा ब्रेक निकामी झाल्‍याने अपघात
खालापूर, ता. १३ (बातमीदार) ः तालुक्यात दोन वेगवेगळ्या रस्ते अपघातांत तीन जणांचा मृत्‍यू झाला आहे. पहिला अपघात शनिवारी (ता. १२) सायंकाळी सहाच्या सुमारास जुन्या मुंबई-पुणे महामार्गावर अंडा पॉइंटनजीक झाला. पुण्याकडे अवजड लोखंडी पाइप घेऊन जाणाऱ्या ट्रकने चढणीवर असताना अचानक ब्रेक दाबल्याने लोखंडी पाइप रस्त्यावर पडले. ट्रकच्या मागे असलेल्या दुचाकी आणि चारचाकीवर हे पाइप पडले. दुचाकीवरील ऋतुजा चव्हाण (वय २६, रा. पुणे) हिचा जागीच मृत्यू झाला. लोखंडी पाइप कारची काच फोडून चालकाच्या शेजारी बसलेल्या अंकिता शिंदे यांच्या अंगावर पडले. यामध्ये अंकिता शिंदे यांचादेखील जागीत मृत्यू झाला. दुचाकीवरील ऋतुजा हिच्यासोबत असलेला वैभव गलांडे (२९, रा. पुणे) गंभीर जखमी झाला आहे तर कारमधील ललित शिंदे (३०), लता शिंदे (५०), सोनाली खडतरे (३३) शिवराज खडतरे (सहा, सर्व रा. पुणे) हे किरकोळ जखमी झाले आहेत. अपघातानंतर बोरघाट वाहतूक पोलिस आयआरबी देवदूत पथक, अपघातग्रस्त मदत पथक यांनी मेहनत घेत पाइपखाली अडकलेल्या वैभव गलांडे याची सुटका केली.
दुसरा अपघात शनिवारी रात्री दीडच्या सुमारास मुंबई-पुणे द्रुतगती मार्गावर सावरोली गावाच्या हद्दीत घडला. पुण्याकडे डिझेल घेऊन जाणारा चालक अमरसिंग यादवने टँकर रस्‍त्‍यालगत उभा करून लघुशंका करण्यासाठी उतरला होता. या वेळी मागून भरधाव आलेल्या टेम्पोची धडक बसून त्याचा जागीच मृत्यू झाला. अपघाताची नोंद खालापूर पोलिस ठाण्यात करण्यात आली आहे.