साधुसंतांच्या महाराष्ट्राला ''मद्यधुंद'' करण्याचा डाव

साधुसंतांच्या महाराष्ट्राला ‘मद्यधुंद’ करण्याचा डाव
मद्यविक्री परवाने खुले करण्यास राष्ट्रवादीचा विरोध; बहिणींना रस्त्यावर उतरण्याचे आव्हान
सकाळ वृत्तसेवा
ठाणे, ता. १३ : राज्यात ५० वर्षांनंतर सुमारे ३२८ दारूच्या दुकानांना (वाइन शॉप्स) परवाने दिले जाणार आहेत. लाडकी बहीण योजनेमुळे महाराष्ट्राच्या तिजोरीवर पडणारा भार कमी करण्यासाठी आणि महसूल वाढविण्यासाठी या सरकारने लाडक्या बहिणींच्या पतीला, पित्याला आणि भावाला व्यसनाधीन बनवण्याचा चंग बांधला असल्याची टीका करीत राष्ट्रवादी शरद पवार गटाचे राष्ट्रीय सरचिटणीस व मुख्य राष्ट्रीय प्रवक्ते डॉ. जितेंद्र आव्हाड यांनी सरकारच्या मद्यविक्री धोरणाला कडाडून विरोध केला.
पाशवी बहुमतामुळे सत्तेची झिंग चढलेले हे सत्ताधुंद सरकार साधुसंतांच्या महाराष्ट्राला मद्यधुंद करणार असल्याचे म्हणत आव्हाड यांनी या निर्णयाविरोधात आता बहिणींनी रस्त्यावर उतरावे, असे आवाहनही त्यांनी केले.
राज्य सरकारने मद्यविक्रीचे परवाने खुले करण्याचा निर्णय घेतला. त्याला विरोध दर्शविण्यासाठी राष्ट्रवादी शरद पवार गटाने पत्रकार परिषद घेतली होती. या वेळी त्यांनी सरकारच्या भूमिकेवर सडकून टीका केली.
---------------------------------
गोऱ्हे-दंडवते यांनी रान पेटवले
१९७४मध्ये तत्कालीन सरकारने मद्यविक्री परवाने खुले करण्याचा निर्णय घेतला होता. त्याविरोधात मृणाल गोऱ्हे, अहिल्याबाई रांगणेकर, मधु दंडवते आदींनी राज्यभर रान पेटवले होते. त्या वेळी सरकारने हा निर्णय मागे घेतला होता. पण आता ५० वर्षांनंतर पुन्हा ते खुले करून सरकारच्या विरोधात कोणी बोलू नये, यासाठी महाराष्ट्रातील जनतेने शुद्धीत राहूच नये, याची तजवीज हे सरकार करीत आहे.
-------------------------------------
४७ कंपन्यांची यादी
५० वर्षांपूर्वीचे परवाने १५ कोटी रुपयांना विकले जात आहेत. आता हे नवीन परवाने एक कोटीला विकले जाणार आहेत. हे परवाने ज्या ४७ कंपन्यांना दिले जाणार आहेत, त्यांचे संचालक कोण आहेत हे जरा तपासून पाहा, असे सांगत त्यांनी ४७ कंपन्यांची यादीच वाचून दाखविली. या कंपन्यांच्या संचालकांनी मंत्रालयाच्या पहिल्या मजल्यापासून सहाव्या मजल्यापर्यंत ठाण मांडले असल्याचेही त्यांनी सांगितले.
---------------------------------
सरकारला सत्तेची झिंग
सत्तेची झिंग चढलेले हे सरकार पाशवी बहुमताच्या जोरावर महाराष्ट्राला गटारगंगेत टाकत आहे. त्यामुळेच या सरकारची निशाणी मॅक्डोनाल्ड, जॉनी वॉकर अशीच असणार आहे. २४० सदस्यांच्या पाशवी बहुमताने जर सरकारच्या डोळ्यावर झिंग चढली असेल तर या झिंगेमुळे बंद झालेले डोळे जनताच उघडेल, असा इशाराही डॉ. जितेंद्र आव्हाड यांनी दिला.