हातोडीने हल्ला करत आठ लाखांचे दागिने लंपास

अंबरनाथ, ता. १३ (वार्ताहर) : हेल्मेट व रेनकोट घालून आलेल्या चोरट्याने सुमारे आठ लाखांचे दागिने चोरून दोघांवर हातोडीने हल्ला केल्याची धक्कादायक घटना अंबरनाथमध्ये घडली. यामध्ये दिव्यांग दीर व वहिनी दोघेही गंभीर जखमी झाले असून त्यांच्यावर सुरुवातीला खासगी रुग्णालयात उपचार सुरू होते. मात्र, प्रकृती गंभीर असल्याने उल्हासनगरच्या शासकीय मध्यवर्ती रुग्णालयात हलविण्यात आले. याप्रकरणी शिवाजीनगर पोलिस ठाण्यात गुन्हा दाखल झाला असून, पोलिस फरार आरोपीचा शोध घेत आहेत.
अंबरनाथमध्ये दिवसाढवळ्या झालेल्या चोरीच्या या घटनेने परिसरात दहशत पसरली आहे. पूर्वेच्या शिवगंगानगरमधील शिवश्रद्धा अपार्टमेंटमध्ये शनिवारी संध्याकाळी साडेसहाच्या सुमारास ही घटना घडली. रुची गायकवाड (वय ३२) या गृहिणी आहेत. शनिवारी संध्याकाळी त्यांच्या घराचा दरवाजा उघडा होता. यावेळी त्यांचा दीर गणेश गायकवाड व मुलगी विधी घरात असताना चोरट्याने हेल्मेट व काळ्या रंगाचा रेनकोट; तसेच हातात बॅग घेऊन गायकवाड यांच्या घरात घुसून चोरी केली. या वेळी घरातील लोखंडी कपाट उघडून कपाटातील सात लाख ८७ हजारांचे सोन्याचे दागिने चोरून चोरटा पसार होत असताना गणेशने प्रतिकार केला. मात्र, चोरट्याने गणेशवर हातोडीने हल्ला करून जखमी केले. घरात गोंधळ कसला हे पाहायला आलेल्या रुचि हिच्या डोक्यातही चोरट्याने काचेचा ग्लास फोडला. या हल्ल्यात दोघे गंभीर जखमी झाले आहेत. त्यांच्यावर एका खासगी रुग्णालयात उपचार सुरू होते; मात्र प्रकृती चिंताजनक झाल्याने त्यांना उल्हासनगरच्या शासकीय रुग्णालयात स्थानिकांच्या मदतीने हलवण्यात आले. याप्रकरणी शिवाजीनगर पोलिस ठाण्यात गुन्हा दाखल आहे. पोलिस सीसीटीव्हीच्या आधारे आरोपीचा शोध आहेत.