दुकानातून रोख रक्कम चोरणाऱ्या दोघांना अटक

उल्हासनगर, ता. १३ (वार्ताहर) : उल्हासनगरातील गजबजलेल्या कॅम्प ५ परिसरात दोन दिवसांपूर्वी घडलेली चोरीची घटना सीसीटीव्ही कॅमेऱ्यात कैद झाल्यानंतर हिललाइन पोलिसांनी चोरट्यांचा माग काढण्यास सुरुवात केली. याप्रकरणी दोघांना अटक करत २२ हजारांची रोकड हस्तगत केली आहे.
उल्हासनगर कॅम्प ५ येथील प्रेमनगर टेकडी परिसरातील रमेश स्टोअर्स या दुकानातून चोरट्यांनी ५३ हजार रुपयांची रोकड लंपास केली होती. ही घटना सीसीटीव्ही कॅमेऱ्यात स्पष्टपणे कैद झाली होती. त्याआधारे पोलिसांनी तांत्रिक पातळीवर तपासाची दिशा ठरवत गुन्हेगारांचा मागोवा घेतला. अवघ्या काही दिवसांतच दोन्ही आरोपी पोलिसांच्या तावडीत सापडले. हिललाइन पोलिसांनी दोघा चोरट्यांना अटक केली असून, त्यांच्याकडून तब्बल २२ हजार रुपयांची रोख रक्कम हस्तगत केली आहे. उर्वरित रक्कम कुठे आणि कशी खर्च झाली याबाबत चौकशी सुरू आहे. या कारवाईत हिललाइन पोलिस ठाण्याचे वरिष्ठ पोलिस निरीक्षक अनिल जगताप यांच्या मार्गदर्शनाखाली तपास पथकातील अधिकाऱ्यांनी आणि कर्मचाऱ्यांनी अत्यंत दक्षतेने तपास केला.