भाववाढीमुळे फोडणीतून लसूण गायब

अलिबाग (वार्ताहर) ः वरणापासून भाजीपर्यंत प्रत्येक फोडणीत आवश्यक असलेल्या आरोग्यदायी लसणाचे भाव काही दिवसांपासून वाढले आहेत. अवेळी आलेल्‍या पावसामुळे लसणाचे उत्पादन घटले आहे. याचा थेट परिणाम भाववाढीवर झाला असून, रायगड जिल्ह्यातील काही बाजारांत उत्तम प्रतीचा लसूण १८०-२०० रुपये किलो भावाने विकला जात आहे.
आहारात फोडणीसाठी लसणाचा मोठ्या प्रमाणावर वापर केला जातो. बाजारात महिनाभरापूर्वी १२० रुपयांना मिळणाऱ्या लसणाची किंमत पंधरवड्यापासून किलोमागे ६० रुपयांनी वाढली आहे. घाऊक बाजारात उत्तम प्रतीच्या मालाची किंमत वाढताच किरकोळ विक्रेत्यांनी ग्राहकांची लूट सुरू केली असून, काही ठिकाणी २०० रुपयांना विकला जात आहे. रायगड हे मुंबईच्या जवळच असल्यामुळे बाजारात नाशिक, पुणे, मध्य प्रदेश, राजस्थान आणि गुजरातमधून लसणाची आवक होते.
खराब हवामानामुळे अनेक राज्यांत लसणाच्या पिकाचे मोठे नुकसान झाले आहे, तर दुबार लागवड केली असली तरी उत्‍पादनास वेळ लागत आहे. नवीन लसणाची आवक कमी असल्‍याने भाववाढ झाली आहे. मध्य प्रदेशात लसणाची सर्वाधिक लागवड केली जाते. दुबार लागवड केलेल्‍या लसणाचे पीक बाजारात येताच लसणाचे भाव उतरतील, असा अंदाजही व्यक्त केला जात आहे.
वळीव पावसाचा मोठा परिणाम लसणाच्या उत्पादनावर झाल्याने बाजारात यंदा लसणाची आवक घटली आहे. सध्या मागणी जास्त आणि उत्पादन कमी अशी स्थिती असल्‍याने भाव वाढल्‍याचे विक्रेते महेंद्र पाटील यांनी सांगितले.