खड्ड्यात वृक्षारोपण करत ठाकरे गटाचे आंदोलन

रस्त्यातील खड्ड्यात वृक्षारोपण
सकाळ वृत्तसेवा
डोंबिवली, ता. १३ : पश्चिमेतील रस्त्यांवर खड्डे पडल्याने नागरिक, चालकांना दररोज वेगवेगळ्या त्रासाला सामोरे जावे लागत आहे. या खड्ड्यांत वाहने आदळून अपघात होण्याची भीती व्यक्त होत आहे. यापूर्वीही डोंबिवली शहरात खड्ड्यांमुळे अपघात होऊन काही नागरिकांना आपले जीव गमवावे लागल्याच्या घटना घडल्या आहेत. पश्चिमेतील सुभाष रस्त्यावरील खड्ड्यांमुळे अपघातांना निमंत्रण मिळत आहे. याच्या निषेधार्थ शिवसेना ठाकरे गटाच्या वतीने रविवारी (ता. १३) निषेध आंदोलन करण्यात आले. खड्ड्यात वृक्षारोपण करत शासनाच्या कामाचा निषेध ठाकरे गटाच्या पदाधिकाऱ्यांनी केला.

ठाकरे गटाचे जिल्हाप्रमुख दीपेश म्हात्रे यांच्या सूचनेनुसार शहरप्रमुख प्रकाश तेलगोटे, उपशहरप्रमुख संजय पाटील, जगदीश जंगम यांसह अनेक पदाधिकारी या वेळी उपस्थित होते. खड्डे बुजविण्याचे काम कंत्राटदारांना देण्यात आले आहे; मात्र पावसाचे कारण देत खड्डे बुजविले जात नाहीत. पावसाने उघडीप दिल्यानंतर त्यात डेब्रिज टाकण्यात येते, पण पूर्ण खड्डा बुजला जाईल अशा पद्धतीने ते भरले जात नाहीत. परिणामी वाहनांच्या वर्दळीमुळे, पावसामुळे ते डेब्रिज बाजूला होऊन खड्डे उघडे पडतात. खड्डे कशा पद्धतीने बुजविले जात आहेत, याकडेे प्रशासन लक्ष देणार आहे का, असा आमचा सवाल आहे. प्रशासनाचे लक्ष नसल्यानेच सगळा गलथान कारभार शहरात सुरू आहे. त्याच्या निषेधार्थ हे आंदोलन केल्याचे या वेळी शहरप्रमुख तेलगोटे यांनी सांगितले.