वाहतूक पोलीस अधिकाऱ्याची गळफास घेऊन आत्महत्या

वाहतूक पोलिसाची
गळफासाने आत्महत्या
घाटकोपर, ता. १३ (बातमीदार) : मुंबई पोलिसांच्या विक्रोळी वाहतूक विभागात सहाय्यक पोलिस उपनिरीक्षकपदी कार्यरत असलेल्या शंकर सोळसे यांनी विक्रोळी पार्क साइट येथे रविवारी पहाटे घरात साडीने गळफास घेऊन आत्महत्या केली. पार्क साइट पोलिस ठाण्यात अपघाती मृत्यूची नोंद झाली आहे.

सोळसे यांचा दीड वर्षांपूर्वी पोलिसांच्या आझाद मैदान वाहतूक विभागात कार्यरत असताना वाहन अपघात झाला होता. तेव्हापासून ते तणावात होते. त्यांच्या सोयीसाठी त्यांना विक्रोळी वाहतूक विभागात बदली देण्यात आली होती, असे सांगण्यात येते. त्यांच्या आत्महत्येमागे कोणतेही कारण नसल्याचे त्यांच्या कुटुंबीयांनी पोलिसांना सांगितले. आज सकाळी साडेआठ वाजता त्यांच्या पत्नीने त्यांना गळफास घेतलेल्या स्थितीत पाहिले. सोळसे यांना राजावाडी हॉस्पिटल येथे नेले असता, त्यांना तेथे मृत घोषित करण्यात आले, अशी माहिती पार्क साइट पोलिस ठाण्याचे वरिष्ठ पोलिस निरीक्षक संतोष घाटेकर यांनी सांगितले.