खंडणीखोरांना न्यायालयाचा दणका

खंडणीखोरांना न्यायालयाचा दणका
गँगस्टर सुरेश पुजारीमार्फत धमकी देणाऱ्यांचे अटकपूर्व संरक्षण नाकारले

उल्हासनगर, ता. १३ (वार्ताहर) : शहरात २०२१ साली गँगस्टर सुरेश पुजारीकडून भाजप नेते अमित वाधवा यांना जीवे मारण्याची धमकी देत तब्बल एक कोटी रुपयांची खंडणी मागितल्याचा प्रकार घडला होता. याप्रकरणी गुन्हा दाखल असून, या प्रकरणातील आरोपींना अटकेपासून संरक्षण देणारा आदेश मुंबई उच्च न्यायालयाने नुकताच रद्द केला आहे. न्या. नितीन सांबरे यांनी दिलेल्या निर्णयात सुशील उदासी, पंकज तिलोकानी व उमेश राजपाल यांची पोलिस कोठडी आवश्यक असल्याचे स्पष्ट केले आहे. त्यामुळे या तिघांच्या अटकेचे मार्ग मोकळे झाले असून, त्यांना पुढील चार आठवड्यांची तात्पुरती दिलासादायक मुदत देण्यात आली आहे.

उल्हासनगरातील कल्पतरू को-ऑप. क्रेडिट सोसायटीचे अध्यक्ष व भाजप पदाधिकारी अमित वाधवा यांच्याकडून चार जणांनी दोन कोटींपेक्षा अधिक कर्ज घेतले होते, मात्र त्यांनी पैसे परत केले नाहीत. वाधवा यांनी या रकमेबाबत मागणी करताच या चौघांनी कुख्यात गँगस्टर सुरेश पुजारीची मदत घेतली. पुजारीने वाधवा यांना थेट फोन करून धमकी देत एक कोटींची खंडणी मागितली. याचे कॉल रेकॉर्ड अमित वाधवा यांनी पोलिसांकडे सादर केले. त्यात सुरेश पुजारीकडून सुशील उदासी, पंकज तिलोकानी, उमेश राजपाल आणि रोशन महेश माखिजा यांच्या वतीने धमकी देण्यात आली होती. या आरोपांवर आधारित गुन्हा उल्हासनगर पोलिस ठाण्यात दाखल झाला आणि तपास ठाणे क्राइम गुन्हे शाखेकडे सोपवण्यात आला होता. या प्रकरणातील रोशन माखिजा याला सत्र न्यायालयातून जामीन मिळाला होता, तर उर्वरित तिघांनी उच्च न्यायालयाकडून अटकपूर्व संरक्षण घेतले होते.

...
पुराव्यावरून आरोपांची पुष्टी
अमित वाधवा यांनी या अटकपूर्व संरक्षणाविरोधात याचिका दाखल केली होती. यावर सुनावणी करताना न्या. नितीन सांबरे यांनी म्हटले, ‘तक्रारदाराने सादर केलेला ट्रान्सक्रिप्ट आरोपीविरोधातील आरोपांची पुष्टी करतो आणि त्यामुळे तपासासाठी त्यांची कोठडी आवश्यक आहे.’ न्यायालयाने अटकपूर्व संरक्षण रद्द करीत आरोपींना चार आठवड्यांची तात्पुरती सवलत दिली आहे. त्यानंतर त्यांना अटक होणार हे निश्चित मानले जात आहे.

उच्च न्यायालयाने दिलेला निर्णय हा माझ्यासारख्या सामान्य नागरिकांसाठी मोठा विजय आहे. या प्रकरणात मला जीवे मारण्याची धमकी देऊन एक कोटींची खंडणी मागण्यात आली. मी अन्यायाविरुद्ध लढा दिला आणि न्यायालयाने आरोपींविरुद्ध पोलिस तपासासाठी मार्ग मोकळा केला. हा निर्णय उल्हासनगरातील सर्व व्यापाऱ्यांच्या सुरक्षेसाठी महत्त्वाचे पाऊल आहे. आता हे आरोपी आणि त्यांचे गुन्हेगारी रॅकेट पूर्णपणे उघडकीस येईल, अशी आशा आहे. हे आरोपी पुजारीला उल्हासनगरातील अनेक व्यावसायिकांची माहिती पुरवत होते. त्यांचा तपास झाल्यास आणखी अनेक धक्कादायक बाबी समोर येतील.
- अमित वाधवा, तक्रारदार