विरारमध्ये महावितरण विरोधात निषेध

विरारमध्ये महावितरणविरोधात निषेध
बोळिंज, ता. १३ (बातमीदार) : विरार पूर्वेला बहुजन विकास आघाडीतर्फे रविवारी (ता. १३) महावितरणवर धडक मोर्चा काढण्यात आला. या वेळी मोर्चासाठी परवानगी नसल्याने नागरिकांनी एकत्रित येऊन आपल्या नेत्यांसह महावितरणच्या अधिकाऱ्यांसोबत सभा घेतली आणि नागरिकांना या वेळेस मार्गदर्शन केले.
वसई-विरारमध्ये महावितरणतर्फे नवीन मीटर बसवूनदेखील भरमसाट वीजबिल येत असल्याने नागरिक त्रस्त आहेत. तसेच नागरिकांच्या प्रश्नांचे समाधान महावितरणच्या अधिकाऱ्यांकडून होत नसल्याने नागरिकांच्या तक्रारी वाढत चालल्या होत्या. त्या पार्श्वभूमीवर विरार पूर्वेला विवा तारांगण येथे बहुजन विकास आघाडीचे माजी आमदार क्षितिज ठाकूर, संघटक सचिव अजीव पाटील, माजी नगरसेवक सभापती प्रशांत राऊत, प्रफुल साने यांच्या तर्फे सभा आयोजित करण्यात आली होती. यात महावितरणच्या अधिकाऱ्यांना नागरिकांच्या समस्यांबाबत विचारणा करण्यात आली. महावितरणच्या अधिकाऱ्यांनी नागरिकांच्या समस्या ऐकून घेत लवकरात लवकर सोडवण्याचे आश्वासन या वेळी दिले.