महिला प्रवाशाशी हुज्जत घालणारा रिक्षा चालक झाला पसार

महिला प्रवाशाशी हुज्जत घालणारा रिक्षाचालक पसार
वाहतूक विभागाकडून दंडात्मक कारवाई
ठाणे शहर, ता. १३ (बातमीदार) : आमचे भाडे घेण्यास नकार देत महिला प्रवाशासोबत हुज्जत घालणाऱ्या रिक्षाचालकावर वाहतूक विभागाने गैरवर्तणुकीची कारवाई केली आहे. महिलेसोबत मुजोरी करणाऱ्या रिक्षाचालकाचे नाव श्रीकांत राठोड असे असून, हा प्रकार शुक्रवारी (ता. १०) स्थानक परिसरात घडला होता. वाहतूक विभागाने त्याचा शोध घेण्याचा प्रयत्न केला असता तो गावी गेल्याचे त्याच्या वडिलांकडून सांगण्यात आले.
ठाणे स्थानक परिसरात शुक्रवारी एक महिला प्रवासी रिक्षामध्ये बसली असता रिक्षाचालकाने त्याच्यासोबत गैरवर्तणूक केली; मात्र महिलेने पोलिस ठाण्यात तक्रार न देता त्या रिक्षाचालकाचे चित्रीकरण करून ते सोशल मीडियावर व्हायरल केले. त्या वायरल चित्रीकरणाच्या आधारावर वाहतूक विभागाने संबंधित रिक्षाचालकाला ५०० रुपयांचा दंड केला. तसेच त्याच्याशी मोबाईलवर संपर्क साधला असता त्याच्या वडिलांनी श्रीकांत दोन दिवसांपूर्वीच गावी गेल्याचे सांगितले.