भूमापनात आधुनिक तंत्राचा वापर

अलिबाग, ता. १४ (वार्ताहर) : रायगड भूमी अभिलेख विभागाने अत्‍याधुनिक प्रणाली विकसित केली असून, त्‍यामुळे भूमापनात अचूकतेबरोबरच पारदर्शकता येणार आहे. विभागातील कर्मचारी प्रत्‍यक्ष जागेवर जातात की नाही, तसेच अर्जदाराबरोबर समन्वय साधण्यासाठीही या प्रणालीचा उपयोग होणार आहे. रायगड जिल्ह्यातील नागरिकांकडून याला चांगला प्रतिसाद मिळत आहे.
भूमी अभिलेख विभागाकडून आधुनिक तंत्रज्ञानाचा वापर करून नागरिकांना झटपट सुविधा उपलब्‍ध करून देण्याचा प्रयत्‍न आहे. याचाच एक भाग म्हणून ई-गव्हर्नन्समध्ये जीपीएसद्वारे थेट सर्व्हेक्षण केले जात आहे. नागरिक आपल्‍या जमीन मोजणीसाठी भूमी अभिलेख विभागाकडे अर्ज करतात. त्यानुसार विभागातर्फे मोजणीची तारीख कळवली जाते. कळवलेल्या तारखेला अनेकदा भूकरमापक उशिराने पोहोचत असल्याच्या तक्रारी जिल्हा भूमी अभिलेख विभागाकडे प्राप्त झालेल्या होत्या. अशा प्रकारच्या तक्रारी भविष्यात उद्भवू नयेत, यासाठी मोजणी अर्जदार आणि भूकरमापक यांच्यामध्ये समन्वय राहावा तसेच भूकरमापक हे निश्चित कोठे आहेत, याबाबत स्पष्टता यावी याकरिता मोजणी कामी भूकरमापक यांनी थेट निश्‍चित ठिकाण या सुविधेचा वापर करण्याचे ठरवले आहे.

असे चालते काम
भूमापन करणारे कर्मचारी (भूकरमापक) मोजणीस जाण्यापूर्वी त्यांचे निश्‍चित स्थान (लाइव्ह लोकेशन) संबंधित अर्जदार तसेच कार्यालय प्रमुखांचा मोबाईल क्रमांक व कार्यालयातील व्हॉट्सॲप ग्रुपवर शेअर करतात. त्यामुळे कर्मचारी हे मोजणी स्थानापासून किती अंतरावर आहेत व मोजणीस्थळी निश्चित कोणत्या वेळी पोहोचणार आहेत, याबाबत निश्चित माहिती अर्जदारांना उपलब्ध होईल. भूकरमापकांना दिलेल्या तारखेला किंवा वेळेत पोहोचता आले नाही तर विभाग पर्यायी भूकरमापक पाठवून मोजणी करून घेत आहेत.

जीपीएसद्वारे थेट प्रक्षेपणातून कार्यालय प्रमुखांना आपले कर्मचारी मोजणीस्थळी पोहोचले आहेत किंवा नाही, याबाबत माहिती मिळते. तसेच अर्जदाराच्या शंकांचे निरसन करणेही सोपे जाते. दैनंदिन मोजणी कामावर नियंत्रण ठेवण्यास मदत होत असून, कामात पारदर्शकता येत आहे.
- सुनील इंदलकर, अधीक्षक, जिल्हा भूमी अभिलेख
-------------------