गुन्हे वार्ता

भिवंडीत वीजचोरीप्रकरणी घरमालकाविरोधा गुन्हा दाखल
भिवंडी, ता. १४ (बातमीदार) : तालुक्यातील दापोडा गावात एका घरमालकाने टोरेंट पॉवर कंपनीची वीजचोरी केल्याची घटना उघडकीस आली आहे. या बेकायदा जोडणीमुळे कंपनीला १.७५ लाख रुपयांचे नुकसान झाले आहे. या प्रकरणाची तक्रार शांतीनगर पोलिस ठाण्यात दाखल करण्यात आली आहे.
टोरेंट पॉवर कंपनीच्या कार्यकारी अधिकारी सुश्री निकिता, अशोक मोरे आणि त्यांच्या टीमने दापोडा गावातील घर क्रमांक ११५७/१ येथे चौकशीदरम्यान घरमालक मनोज सखाराम पाटील वीजचोरी करताना आढळले. अधिकाऱ्यांच्या तक्रारीनुसार, पाटील यांनी एक वर्षापासून कंपनीच्या फ्यूज सेक्शन खांबामध्ये बेकायदा जोडणी देऊन ६६५२ युनिट वीज वापरली आहे. ज्यामुळे कंपनीचे एकूण १,८२,९५४.६८ रुपयांचे नुकसान झाले. कंपनीच्या अहवालाच्या आधारे, शांतीनगर पोलिसांनी गुन्हा दाखल केला आहे.

भिवंडीमध्ये कॉपीराइट उल्लंघनाचा गुन्हा उघडकीस
भिवंडी, ता. १४ (बातमीदार) : भिवंडीतील कल्याण रोडवरील साईबाबा मंदिर परिसरात कॉपीराइट उल्लंघनाचा प्रकार समोर आला आहे. सेंट-गोबेन इंडिया प्रायव्हेट लिमिटेड कंपनीच्या नावाने बनावट छतावरील दुरुस्तीची उत्पादने विकल्याबद्दल पोलिसांनी दुकानमालकाविरुद्ध गुन्हा दाखल केला आहे.
अताउल्लाह आलमगीर खान हा मुंबईतील साकीनाका परिसरातील रहिवासी आहे. कंपनीचे कर्मचारी संतोष नालेकर यांनी शांतीनगर पोलिस ठाण्यात ही तक्रार दाखल केली आहे. त्याच्या म्हणण्यानुसार, खानने ए. के. सुपर प्लास्टर नावाच्या दुकानात सेंट-गोबेन कंपनीचे बनावट पीओपी पावडर, पीओपी बॉटम पावडर, पीओपी शीट्स आणि इतर बनावट बांधकाम साहित्य साठवले होते. ही उत्पादने मूळ ब्रँडेड पॅकेजिंगमध्ये विकण्याची तयारी सुरू होती. माहितीच्या आधारे, शांतीनगर पोलिसांनी छापा टाकला आणि घटनास्थळावरून ४८,६७० रुपयांचे बनावट साहित्य जप्त केले. पोलिसांनी कॉपीराइट कायद्यांतर्गत गुन्हा दाखल केला आहे. पोलिस उपनिरीक्षक आनंद राठोड या प्रकरणाचा तपास करत आहेत.