कल्याणमध्ये ३८ मुख्याध्यापकांना नोटीस

कल्याणमध्ये ३८ मुख्याध्यापकांना नोटीस
कल्याण, ता. १४ (वार्ताहर) : कल्याण-डोंबिवली महापालिकेच्या ६१ शाळांपैकी सुमारे ३८ मुख्याध्यापकांना प्रशासनाने कारणे दाखवा नोटिसा बजावल्या आहेत. पालिका शाळांमधील शैक्षणिक दर्जा, सोयीसुविधा तसेच पटसंख्यावाढीबाबत उपायुक्त संजय जाधव यांनी कृती आराखडा तयार करून अमंलबजावणी सुरू केली. त्यानुसार जुलैमध्ये पालिका शाळेतील विद्यार्थ्यांना गणवेश, पुस्तके, बुट शालेय साहित्य वाटप करण्यात आले. शाळाचे पालकत्वासाठी आधिकाऱ्यांकडे दायित्व दिले होते. विद्यार्थ्यांचा शैक्षणिक आलेख आणि प्रगतीसाठी महिन्यातून परीक्षा घेत प्रगती आढावा सुरू केला, तर पालिका आयुक्तांनी पालिका शाळेत जाऊन तासभर विद्यार्थ्यांना शालेय धडे देत प्रशासनाने पालिका शाळा स्मार्ट करण्याबाबत कंबर कसली आहे; मात्र यातून शिक्षकवर्गाने बोध घेतला नसल्याने ३८ मुख्याध्यापकांना उपायुक्तांच्या आदेशानुसार कारणे दाखवा नोटिसा बजावण्यात आल्या. नोटीस बजावलेल्या मुख्याध्यापकांनी कामात कसूर, कामात चालढकलपणा, बेजबाबदारपणा, तसेच पटसंख्यावाढीबाबत प्रयत्न न केल्याचे आढळले. त्याबद्दल त्यांना कारणे दाखवा नोटीस बजावण्यात आली.