वृक्षारोपणातून गुरूंना मानवंदना

वाणगाव, ता. १५ (बातमीदार) : गुरु म्हणजे केवळ शिकवणारे नव्हे, तर जीवनाला योग्य दिशा देणारे मार्गदर्शक असतात. त्यांच्या सान्निध्यात विद्यार्थ्यांचे व्यक्तिमत्त्व घडते आणि मूल्यसंस्कार रुजतात. शिक्षक हा केवळ शाळेचा नाही, तर जीवनाच्या प्रत्येक टप्प्यावर असणारा दीपस्तंभ असतो, असे प्रतिपादन सोनोपंत दांडेकर महाविद्यालयाचे माजी प्राचार्य आणि रोटरी क्लब ऑफ पालघरचे अध्यक्ष संजय महाजन यांनी गुरुपौर्णिमा कार्यक्रमात केले आहे. या वेळी कार्यक्रमाचे प्रमुख मार्गदर्शक प्रा. संजय महाजन यांच्या हस्ते वृक्षारोपण करून गुरुजनांना वंदन करण्यात आले. एकलव्य शासकीय औद्योगिक प्रशिक्षण संस्था, पालघर येथे जिल्हा व्यवसाय शिक्षण व प्रशिक्षण अधिकारी महेशकुमार सिडाम यांच्या मार्गदर्शनाखाली गुरुपौर्णिमा उत्सव उत्साहात साजरा करण्यात आला.