तुर्भे स्थानक अस्वच्छतेच्या गरड्यात हरवले

तुर्भे स्थानकालगतच्या भुयारी मार्गात सांडपाणी
अस्वच्छतेमुळे प्रवासी त्रस्‍त
तुर्भे, ता. १४ (बातमीदार) ः तुर्भे रेल्वेस्थानक बाहेरून चकाचक दिसत असले तरी सोयीसुविधांअभावी प्रवाशांना गैरसोयींचा सामना करावा लागतो. स्थानकाच्या पूर्वेकडील औद्योगिक पट्टा तसेच झोपडपट्टीबहुल परिसर आणि पश्चिमेकडील रहिवासी वस्तीला जोडणारा भुयारी मार्ग रेल्वे मार्गाखालून काढण्यात आला आहे. तुर्भे स्टोअर, इंदिरानगर, तुर्भे नाका, हनुमान नगर, गणपती पाडा या परिसरातील रहिवासी तुर्भे कॉलनी, एपीएमसी, वाशी या परिसरात ये-जा करण्यासाठी याच भुयारी मार्गाचा वापर करतात, मात्र सध्या भुयारी मार्गात पावसाच्या पाण्यासोबत दुर्गंधी मिश्रित पाणी जमा होत असल्‍याने नागरिकांना यातूनच मार्गक्रमण व्हावे लागते.
तुर्भे परिसरात औद्योगिक वसाहत असल्यामुळे दररोज हजारो नोकरदार ये-जा करतात. अतिवृष्‍टीत गुडघाभर पाण्यातून मार्गक्रमण करावे लागते. स्थानकाच्या पायऱ्या ठिकठिकाणी तुटल्या आहेत. त्‍यामुळे धावपळीत गाडी पकडताना वृद्ध नागरिक, महिला आणि लहान मुले घसरून पडण्याचे प्रकार वारंवार घडले आहेत. स्‍थानकातील शौचालयांची स्थिती दयनीय आहे. फलाटालगत असलेले सार्वजनिक शौचालयही अस्वच्छ असल्‍याने दुर्गंधी पसरते.

स्‍थानकाची दुरवस्‍था
फलाटावरील पंखे बंद
पायऱ्या तुटलेल्या
शौचालय अस्वच्छ
गळके छत
पाणपोई असून पाणी नाही
स्थानकाच्या पूर्वेकडील तिकीट खिडक्या बंद
गर्दुल्यांचा वावर
बहुतांश सीसीटीव्ही बंद

स्‍थानकातील दैनंदिन वर्दळ
प्रवासी - १५ हजार
तिकीटविक्री - ५ हजार
महसूल - दीड लाख

तुर्भे स्थानकात मुख्य समस्या आहे ती सांडपाणी साचण्याची. भुयारी मार्गात पाणी तुंबत असल्याने प्रवाशांना सांडपाण्यातूनच वाट काढावी लागते. फलाटाच्या छताला ठिकठिकाणी गळती लागली असून, भटक्‍या कुत्र्यांचा वावर असतो. स्‍थानकातील पायऱ्या तुटल्याने धावपळीत घसरून पडण्याची भीती वाटते.
- सचिन चिलमे, प्रवासी