कोपरीत गॅरेजला भीषण आग

कोपरीत गॅरेजला भीषण आग
सहा दुचाकीसह १५ ऑइलचे डबे खाक
सकाळ वृत्तसेवा
ठाणे, ता. १४ : रेल्वेस्थानकाच्या हाकेच्या अंतरावर असलेल्या कोपरी येथील कपडा मार्केटजवळील एका गॅरेज गाळ्याला आग लागल्याची घटना सोमवारी (ता. १४) सकाळी ८च्या सुमारास घडली. या घटनेत कोणतीही जीवितहानी झाली नसली तरी मोठ्या प्रमाणात वित्तहानी झाली आहे. गाळ्यातील सहा भंगार दुचाकी, दोन लाकडी कपाटे, तीन लोखंडी रॅक, १५ इंजिन ऑइलचे डबे, गाळ्यातील प्लॅस्टिक व लाकडी भंगार, इलेक्ट्रिक वायरिंग पूर्णपणे जळून खाक झाले आहे. अशी माहिती ठाणे महापालिका आपत्ती व्यवस्थापन अधिकाऱ्यांनी दिली.
कोपरी, ठाणे पूर्व येथे असलेल्या कपडा मार्केटजवळील सोनू ऑटो पार्टस अँड गॅरेज या दुकानाला सकाळच्या सुमारास आग लागल्याची माहिती रितेश जाधव या दक्ष नागरिकाने ठाणे महापालिका आपत्ती व्यवस्थापन कक्षाला दिली. हा प्रकार ठाणे रेल्वेस्थानकाजवळ घडल्याने, तसेच सकाळी कामाला जाणाऱ्या चाकरमान्यांची वर्दळ लक्षात घेताच ठाणे पालिकेचे अग्निशमन दल, आपत्ती व्यवस्थापन आणि कोपरी पोलिसांनी तत्काळ धाव घेतली. याचदरम्यान अग्निशमन दलाच्या जवानांनी आगीवर नियंत्रण मिळविण्यासाठी शर्थीचे प्रयत्न सुरू केले; मात्र त्या गाळ्यात ऑइल, भंगार, लाकडी भंगार आणि प्लॅस्टिक असल्याने आगीने रुद्ररूप धारण केले होते. त्यातच धूर मोठ्या प्रमाणात झाल्याने तो आकाशात उंच उंच झेपावत होता. अखेर घटनास्थळी दाखल झालेल्या यंत्रणांना एक तासानंतर आगीवर पूर्णपणे नियंत्रण मिळविण्यात यश आले. याचदरम्यान गाळातील सहा भंगार दुचाकी, दोन लाकडी कपाटे, तीन लोखंडी रॅक, १५ इंजिन ऑइलचे डबे, गाळ्यातील प्लॅस्टिक व लाकडी भंगार, इलेक्ट्रिक वायरिंग पूर्णपणे जळून मोठ्या प्रमाणात नुकसान झाले आहे. सुदैवाने या घटनेत कोणालाही दुखापत झालेली नाही, तर या वेळी दोन फायर वाहनासह एक रेस्क्यू वाहन आणि एक वॉटर टँकर पाचारण केल्याची माहिती आपत्ती व्यवस्थापन अधिकाऱ्यांनी दिली.