संवेदनशील क्षेत्राला ग्रामस्‍थांचा विरोध

रोहा, ता. १४ (बातमीदार) ः रायगड जिल्ह्यातील सात तालुक्यांतील ७३४ गावांना पर्यावरण संवेदनशील क्षेत्र घोषित करण्यात आले असून, संबंधित तहसील कार्यालकडून गावांना नोटिसा देण्यात आल्या आहेत. या नोटिसांबाबत ६० दिवसांत हरकती मागवल्या आहेत. या अनुषंगाने रोहा तालुक्यातील देवकान्हे, धानकान्हे, चिल्हे व तळवळी ग्रामस्थांनी संघटित होऊन विरोध दर्शवला आहे. रविवारी खासदार सुनील तटकरे यांची सुतारवाडी येथे भेट घेऊन यासंदर्भात निवेदन दिले तसेच आपल्‍या समस्‍या मांडल्‍या.
रोहा तालुक्यातील ११९ गावांना पर्यावरण संवेदनशील क्षेत्र म्हणून घोषित करण्यात आले आहे. त्यापैकी देवकान्हे, धानकान्हे, चिल्हे व तळवली ही अशी गावे आहेत जिथे पर्यावरणाला हानी पोहोचवण्यासारखी परिस्थिती नाही. असे असताना सरकारने या गावांचा नावे संवेदनशील क्षेत्रातील यादी समाविष्‍ट केल्‍याने ग्रामस्थ चिंतेत आहेत. दोन दिवसांपूर्वी ग्रामस्थांनी बैठक घेऊन निर्णय रद्द करण्यासाठी हरकत नोंदवणार असल्‍याचे सांगितले. तसेच खासदार सुनील तटकरे यांची भेट घेण्याविषयी ठराव पारित करण्यात आला. त्‍या अनुषंगाने ग्रामस्‍थांनी रविवारी तटकरे यांची भेट घेत समस्या मांडल्या. या वेळी तळवली ग्रामपंचायत सरपंच रवींद्र मरवडे, देवकान्हेचे उपसरपंच ज्ञानेश्वर भोईर, धोंडू कचरे, किशोर भोईर, शेतकरी संघटना सचिव जगदीश जाधव, वसंत मरवडे, राम महाडीक, राम लोखंडे, संतोष भोईर, देविदास भोईर आदी ग्रामस्थ उपस्थित होते.

जिल्‍ह्यातील ४३७ गावे संवेदनशील
रायगड जिल्ह्यात सात तालुक्यांतील ४३७ गावांचे क्षेत्र पर्यावरण संवेदनशील क्षेत्र म्हणून घोषित करण्यात आले आहे. यात रोहा तालुक्यातील ११९ गावांचा समावेश आहे. केंद्र सरकारच्या जाचक निर्णयाविरुद्ध रोहा तालुक्यातील ग्रामस्थांनी प्रांताधिकारी, वन विभाग व तहसीलदारांना निवेदन देत यांनाही निवेदन देणार असल्याचे ग्रामस्थांनी सांगितले. याप्रकरणी पाठपुरावा करणार असल्‍याचे आश्‍वासन भेटीदरम्यान सुनील तटकरे यांनी दिले.

रोहा : पर्यावरण संवेदनशील क्षेत्राला विरोध करीत ग्रामस्‍थांनी खासदार सुनील तटकरे यांना निवेदन दिले.

-----