वर्दळीच्या पदपथावर मृत्यूचे दूत

घाटकोपर, ता. १४ (बातमीदार)ः घाटकोपर अंधेरी लिंक रोडवरील मरोळ मेट्रो स्थानकाच्या प्रवेशद्वारासमोरील पदपथावर खाद्यपदार्थांचे विक्रेते घरगुती गॅस सिलिंडरचा व्यावसायिक कारणासाठी सर्रासपणे वापर करत आहे. या प्रकारामुळे वर्दळीच्या परिसरात मोठ्या दुर्घटनेची शक्यता आहे.
मेट्रो स्थानक परिसरात वर्दळ असल्याने अनेक स्टॉलधारकांनी कायमस्वरूपी बस्तान मांडले आहे. या ठिकाणी स्टॉलधारकांकडून खाद्यपदार्थ बनवून विक्री केली जाते. त्यामुळे स्टॉलच्या आजूबाजूला मोठ्या प्रमाणात गिऱ्हाईकांची गर्दी होत असल्याने पदपथावरून चालणाऱ्या नागरिकांची गैरसोय होते. विशेष म्हणजे, याच ठिकाणी बेस्टचे तीन वेगवेगळे थांबे असून, बससाठी थांबणाऱ्या प्रवाशांचीही मोठी गर्दी होते. अशातच मेट्रो प्रवासी, इतर पादचाऱ्यांना मार्ग काढताना तारेवरची कसरत करावी लागत असताना घरगुती गॅस सिलिंडरचा वापर मोठ्या दुर्घटनेला निमित्त ठरण्याची शक्यता आहे.
---------------------------
प्रशासनाची डोळेझाक
रेल्वेस्थानकापासून किमान दीडशे फूट अंतरापर्यंत फेरीवाल्यांना किंवा स्टॉलधारकांना मनाई करण्यात आली आहे. तसेच पादचाऱ्यांना चालण्यासाठी पदपथ मोकळे असावेत असा नियम आहे, मात्र नियमांची पायमल्ली होत असून, पालिका, पोलिस प्रशासनाकडून याकडे दुर्लक्ष होत आहे.