रोहा-चणेरा रस्त्यावर मोकाट गुरांचा ठिय्या

रोहा-चणेरा रस्त्यावर मोकाट गुरांचा ठिय्या
अपघातांमध्ये वाढ; वाहनचालक त्रस्त, कारवाईची मागणी
रोहा, ता. १४ (बातमीदार) ः रोहा-चणेरा-साळाव या मुख्य मार्गावर मोकाट गुरे ठिय्या मांडून बसत असल्याने वाहनचालकांना कसरत करावी लागत आहे. शिवाय अपघातांचा धोका असल्याने या गुरांच्या मालकांवर कारवाई करण्यात यावी, अशी मागणी करण्यात येत आहे.
रोहा-चणेरा-साळाव या मुख्य मार्गावर मागील काही वर्षांपासून मोठ्या प्रमाणात वाहनांची वर्दळ वाढली आहे. रोहे शहरातून चणेरामार्गे साळाव येथे मोठ मोठ्या कंपन्या असल्याने त्‍यांची वाहतूकदेखील याच मार्गावरून होत आहे. त्याचप्रमाणे मुरुड, काशीद, रेवदंडा, अलिबाग या भागातील पर्यटन स्थळी फिरण्यासाठी मुंबई-पुणे इत्यादी परगावातील हजारो पर्यटक याच मार्गाचा मुख्यता वापर करतात. तसेच परिसरातील शेकडो विद्यार्थी व कामगार वर्ग याच मार्गाने रोह्यात ये-जा करत असतात, मात्र मागील काही दिवसांपासून या मार्गावर विशेषतः कुंभोशी, गोफण,चांडगावं इत्यादी परिसरातील मोकाट गुरे ठिय्या मांडून बसत आहेत. त्यामुळे वाहन चालक व स्थानिकांना अनेक अडचणीनां तोंड द्यावे लागत आहे. या गुरांमुळे वाहतूक मंदावत असून, अपघाताचा धोका वाढला आहे. रात्रीच्यावेळी या गुरांच्या मैलावरून घसरून दुचाकी चालकांचा अपघात होत आहे. शिवाय गुरांना हटकविले असता ते अंगावर धावून येतात. त्‍यामुळे वाहनचालकांची मोठी गैरसोय होऊ लागली आहे. याविषयी स्थानिक ग्रामपंचायतीमार्फत गुरे मालकांना समज देण्यात यावी तसेच उपाययोजना करण्यात यावी अशी मागणी स्थानिक नागरिक व वाहनचालकांकडून करण्यात येत आहे.