महिलेला रिक्षाची ठोकर

पादचारी महिलेला रिक्षाची ठोकर
सकाळ वृत्तसेवा
डोंबिवली, ता. १४ : शहरातील केळकर रोडवर पायी चालत जाणाऱ्या एका ३० वर्षीय महिलेला पाठीमागून एका रिक्षाचालकाने धडक दिली. या धडकेनंतर रिक्षाचालक तेथे न थांबता घटनास्थळावरून पळून गेला. महिलेने संबंधित रिक्षाचालकाचा पाठलाग करून इंदिरा चौकात त्याला गाठले. त्यानंतर भरचौकात गाठून त्याला धारेवर धरीत महिलेने कडक शब्दांत त्याला सुनावले. यानंतर रिक्षाचालकाने महिलेची माफी मागितल्यानंतर त्याची सुटका झाली.
शुक्रवारी (ता. ११) सायंकाळी ३० वर्षीय एक पादचारी महिला या रस्त्याने चालली होती. या वर्दळीच्या रस्त्यावर भरधाव असलेल्या एका रिक्षाचालकाने केळकर रस्त्याने चाललेल्या पादचारी महिलेला पाठीमागून रिक्षाची धडक दिली. यानंतर रिक्षा इंदिरा चौकाच्या दिशेने नेली. कारण नसताना रिक्षाचालकाने धडक दिल्याने संतप्त झालेल्या महिलेने रिक्षाचा पाठलाग करीत इंदिरा चौकात त्याला गाठले. रिक्षाच्या समोरच उभी राहून चालकास धडक का दिली तसेच नंतर मदत करण्याऐवजी पळून का जात होतास, असे प्रश्न विचारत धारेवर धरले. अखेर वाहतूक पोलिसांनी मध्यस्थी करीत वाद मिटवला.