मेट्रोचे स्थानकाचे जिने भररस्त्यात

मेट्रो स्थानकाचे जिने भररस्त्यात
एमएमआरडीएचा अजब कारभार; उबाठाने वेधले पत्राद्वारे लक्ष

सकाळ वृत्तसेवा
ठाणे, ता. १४ : ठाणे शहरातील घोडबंदर भागात मेट्रोचे काम वेगाने सुरू आहे. अशातच ठाणे ते कासारवडवली या मेट्रो-४ च्या घोडबंदर रोडवरील ओवळा व कासारवडवली येथील स्थानकांचे बांधकाम पूर्णत्वाच्या मार्गावर आहे. या स्थानकांवर ये-जा करणाऱ्या जिन्यांचे बांधकाम घोडबंदर रोड मुख्य रस्त्याच्या सेवा रस्त्यात विलीनीकरणाच्या कामामुळे भररस्त्यात येणार असल्याचा अजब प्रकार समोर आला आहे. याबाबत शिवसेना ठाकरे गटाचे ओवळा-माजिवडा विधानसभा संपर्कप्रमुख नरेश मणेरा यांनी एका लेखी पत्राद्वारे हा प्रकार एमएमआरडीएच्या महानगर आयुक्तांच्या निदर्शनास आणला आहे.
ठाणे-कासारवडवली मेट्रो-४ ची घोडबंदर रोडवरील ओवळा व कासारवडवली ही स्थानके बांधून तयार झाली आहेत. मेट्रो-४ चे काम गेली काही वर्षे सुरू असून, गेल्या वर्षी घोडबंदर मुख्य रस्त्याचे दोन्ही सेवा स्त्यामध्ये विलीनीकरण करण्याचे काम सुरू करण्यात आलेले आहे.
------------------------------------
खर्च वाया जाणार
मेट्रो आणि घोडबंदर रस्ता व सेवा रस्ता विलीनीकरणाचे काम ही दोन्ही कामे एमएमआरडीएकडूनच करण्यात येत असून, या जिन्यांसाठीचा खर्च वाया जाणार असल्याने या नुकसानीस जबाबदार कोण, असा सवालही नरेश मणेरा यांनी पत्रात उपस्थित केला आहे.
------------------------
वाहनचालकांसाठी धोका
घोडबंदर मुख्य रस्ता व सेवा रस्त्याच्या विलीनीकरणामुळे दोन्ही बाजूचे रस्ते हे एकदिशामार्गी होणार असल्याने या रस्त्याला लागून असलेल्या हौसिंग सोसायटीतील दुचाकी-चारचाकी वाहनांच्या चालकांसाठी धोकादायक व असुरक्षित होणार आहे. वाहनचालकांचा वेळ व इंधनही वाया जाणार आहे. त्यासाठी घोडबंदर विलीनीकरण रस्त्याच्या दोन्ही बाजूस निदान नऊ मीटरचा सेवा रस्ता ठेवण्याची आणि संबंधित अधिकाऱ्यांना याबाबत येथील प्रत्यक्ष जागेवर पाहणी करून पुढील योग्य ती कार्यवाही करण्याचे आदेश द्यावेत, अशीही विनंती नरेश मणेरा यांनी महानगर आयुक्तांना केली आहे.