एसटीचे कदापि खाजगीकरण होऊ देणार नाही -परिवहन मंत्री प्रताप सरनाईक

एसटीचे कदापि खागीकरण
होऊ देणार नाही : सरनाईक
सकाळ वृत्तसेवा
मुंबई, ता. १४ : राज्य सरकारचा अंगीकृत सार्वजनिक उपक्रम असलेले एसटी महामंडळ ही सुमारे ८३ हजार कर्मचाऱ्यांची मातृसंस्था आहे. भविष्यात तिचे खासगीकरण कदापि होणार नाही. त्यामुळे कर्मचाऱ्यांनी अशा अफवांवर विश्वास ठेवू नये, असे स्पष्ट प्रतिपादन परिवहनमंत्री तथा एसटी महामंडळाचे अध्यक्ष प्रताप सरनाईक यांनी केले.

मुंबईतील परळ बसस्थानकात आयोजित कार्यक्रमात कामगार नेते भाई जगताप यांच्या संकल्पनेतून आणि राष्ट्रीय एसटी कामगार काँग्रेसचे सरचिटणीस श्रीरंग बर्गे यांच्या पुढाकाराने कर्मचारी व प्रवाशांसाठी जलशीतकाचे लोकार्पण करण्यात आले. या वेळी सरनाईक बोलत होते.

कर्मचाऱ्यांच्या सोयीसुविधांवर भर
सरनाईक म्हणाले, की एसटीचा कर्मचारी अत्यंत मेहनती आहे. तो जिथे कार्यरत आहे तिथे त्याला मूलभूत सुविधा देणे ही एसटी प्रशासनाची नैतिक जबाबदारी आहे. यासाठी चालक-वाहक विश्रांतीगृह, स्वच्छ प्रसाधनगृह यांसारख्या सुविधा अद्ययावत केल्या जातील. लवकरच खासगी स्वच्छता संस्था नेमून, या संस्था विश्रांतीगृहांची देखभाल करतील तसेच कर्मचाऱ्यांचे गणवेश धुवून इस्त्री करून देतील.
----
दाढी अन्‌ केशकर्तनाची व्यवस्थाही
कर्मचाऱ्यांसाठी दाढी आणि केशकर्तनाची सुविधाही त्या संस्थांमार्फत पुरवली जाणार आहे. कर्मचाऱ्यांच्या अशा मूलभूत गरजांकडे लक्ष दिल्यास कामकाजासाठी अनुकूल मानसिक वातावरण तयार होते. त्यामुळे कामाच्या कार्यक्षमतेत वाढ होईल, असा विश्वास सरनाईक यांनी व्यक्त केला.