मॅड संस्थेला गिरिमित्र संस्था सन्मान पुरस्कार

मॅड संस्थेला गिरिमित्र संस्था सन्मान पुरस्कार
सकाळ वृत्तसेवा
डोंबिवली, ता. १५ : शहरातील माउंटेनिअर्स असोसिएशन संस्थेला (मॅड) यंदा गिरिमित्र संस्था सन्मान देऊन गौरविण्यात आले आहे. मुलुंड येथे पार पडलेल्या २२ व्या गिरिमित्र संमेलनात गिरिमित्र लक्पा शेर्पा यांच्या हस्ते हा पुरस्कार संस्थेला प्रदान करण्यात आला. माउंटेनिअर्स असोसिएशन डोंबिवली ही संस्था १९८५ पासून गिर्यारोहण, गडकिल्ले आणि हिमालय मोहिमांचे तसेच विविध वयोगटासाठी साहस शिबिरांचे यशस्वी आयोजन करते. संस्थेतर्फे श्रीमलंगगड रेस्क्यू ऑपरेशन, रक्तदान शिबिर व किल्लारी व भूज भूकंप येथे वैद्दकीय सेवा देण्यात आली. २०२१ महाड येथील पुरामध्ये तेथील बाधित घरांची साफसफाई करण्यात आली. गेली अनेक वर्षे संस्थेतर्फे प्रस्तरारोहण शिबिरे आणि पावसाळ्यात वॉटर फॉल रॅपलिंग आयोजित करण्यात येते. हनुमान टिब्बा, लडाखी, शीतीधर, फ्रेंडशिप, व्हाइट सेल, केदारदोम, जोगिन, श्रीकैलास, स्टॉक कांगरी, कांग यात्से, विधान पर्वत, कामेट, अबिगमिन ही हिमालयातील अनेक शिखरे पादाक्रांत केली. व्हॅली ऑफ फ्लॉवर, मारखा व्हॅली असे हिमालयातील अनेक ट्रेक संस्थेने आयोजित केले. गडांचा अभ्यास करण्यासाठी तसेच हिमालयातील मोहिमांचे आयोजन करण्यात येते. २०२३ यावर्षी संस्थेतर्फे जानेवारीमध्ये लेह चादर ट्रेक, सप्टेंबरमध्ये सतोपंथ ट्रेक तसेच साहस सिंधुदुर्ग, विजयदुर्ग प्रतिकृती व शिवकालीन शस्त्रे, मोडी लिपी पत्रे, याचे प्रदर्शन आयोजित केले होते. २०२४ वटपौर्णिमेनिमित्त फळ झाडांचे वाटप करण्यात आले. आदिवासी विभागात कपड्यांचे वाटप करण्यात आले. या सामाजिक कार्याची दखल घेत त्यांचा पुरस्काराने सन्मान करण्यात आला.