खालापूर पोलिसांचा चौक फाटा येथे रूट मार्च आणि माॅक ड्रिल

खालापूर पोलिसांचा चौक फाटा येथे रूट मार्च आणि माॅक ड्रिल
खालापूर, ता. १४ (बातमीदार) ः आगामी सण-उत्सवाच्या अनुषंगाने पोलिसांचे मॉक ड्रिल व रूट मार्चचे आयोजन मुंबई-पुणे राष्ट्रीय महामार्गावर चौक फाटा परिसरात करण्यात आले होते. खालापूर पोलिस निरीक्षक सचिन पवार यांच्या मार्गदर्शनाखाली हा मार्च झाला.
आखाड महिन्यात मोठ्या संख्येने पर्यटक बाहेर पडणार आहेत. खालापूर आणि कर्जत या दोन ठिकाणी फार्महाउस, हॉटेल्स, ढाबे येथे पर्यटक संख्या मोठी असते. कर्जत-खालापूरचा मध्यबिंदू असलेला चौक फाटा गजबजलेला असतो. सणाची मौजमजा लुटताना कोणताही अनुचित प्रकार घडू नये यासाठी पोलिस विभाग सज्ज झाला असून, सोमवारी (ता. १४) खालापूर पोलिस निरीक्षक सचिन पवार, राखीव पोलिस निरीक्षक, अलिबाग रायगडचे एस. बाविस्कर, दंगा नियंत्रण पथकाचे तीन प्रशिक्षक, मुख्यालयाकडील ७२ अंमलदार, शीघ्रकृती दल वडखळकडील ३५ जवान व खालापूर पोलिस ठाण्याकडील तीन अधिकारी आणि १४ अंमलदार यांनी जुन्या मुंबई-पुणे राष्ट्रीय महामार्गावर चौक फाटा येथून तारापूर चौक बाजारपेठ असा रूट मार्च काढला. याशिवाय चौक कर्जत फाटा येथे शिवाय हाॅटेलसमोर माॅक ड्रिलचे आयोजन करण्यात आले होते.