खुशबू ठाकरे मृत्यु प्रकरणी गुन्हे दाखल करा १६ जुलै रोजी ठिय्या आंदोल

खुशबू ठाकरे मृत्यूप्रकरणी बुधवारी ठिय्या आंदोलन
आंदोलन मागे घेण्यासाठी तहसील कार्यालयात बैठक
पेण, ता. १४ (वार्ताहर) : एकात्मिक आदिवासी विकास प्रकल्पांतर्गत वरवणे आश्रमशाळेत इयत्ता आठवीतील विद्यार्थिनी खुशबू ठाकरे हिचा कुष्ठरोगावरील उपचारादरम्यान मृत्यू झाला. या घटनेला जबाबदार असणाऱ्यांना तत्काळ निलंबित करण्यात यावे, या मागणीकरिता बुधवारी (ता. १६) तहसील कार्यालयासमोर बेमुदत ठिय्या आंदोलन करण्यात येईल, असा इशारा सामाजिक कार्यकर्ते संतोष ठाकूर, नंदा म्हात्रे यांनी दिला होता. त्या अनुषंगाने आज तहसील कार्यालयात बैठक झाली.
या बैठकीत नायब तहसीलदार नितीन परदेशी, निवडणूक शाखा नायब तहसीलदार तुषार कामत, पोलिस उपनिरीक्षक विक्रम नवरखेडे, उपजिल्हा रुग्णालय वैद्यकीय अधिकारी डॉ. संध्या राजपूत, सहाय्यक अधीक्षक पांडुरंग गाडे, सामाजिक कार्यकर्ते संतोष ठाकूर, नंदा म्हात्रे, सी. आर. म्हात्रे, मयत खुशबू ठाकरेचे आई-वडील नामदेव ठाकरे, पोलिस कर्मचारी किशोर घरत तसेच आदिवासी बांधव उपस्थित होते.
या वेळी मयत खुशबू ठाकरे हिच्या मृत्यूबाबतचा अहवाल प्रशासनाने तयार केला असून, तो वरिष्ठांकडे पाठविण्यात येईल. यामध्ये कोणालाही पाठीशी घालण्याचा विचार नाही. यामध्ये शाळेचे मुख्याध्यापक आणि अधीक्षिका हे निलंबित झाले आहेत. आपल्या मागणीनुसार तपास योग्य रीतीने सुरू असल्याने १६ तारखेला होणारे ठिय्या आंदोलन मागे घेण्यात यावे, अशी विनंती प्रशासनाच्या वतीने करण्यात आली आहे.
खुशबू ठाकरे हिच्या मृत्यूप्रकरणी जबाबदार असणाऱ्या अधिकाऱ्यांवर गुन्हे दाखल व्हावे, अशी मागणी आम्ही केली. त्यानुसार राज्य समिती गठित करण्यात आली आहे. दरम्यान, सहा महिने उलटून गेले तरीही समितीचा अहवाल जिल्हा आरोग्य अधिकारी यांच्याकडे आलेला दिसत नाही. त्यामुळे डॉक्टरांना वाचविण्याचा प्रयत्न होत असल्याचे आम्हाला दिसून येत आहे. जर तो अहवाल आमच्याकडे आला नाही तर आम्ही आंदोलनावर ठाम आहोत.
- संतोष ठाकूर, सामाजिक कार्यकर्ते, पेण